विराटनगर । तरकारीको पकेट क्षेत्र भनेर चिनिने सुनसरीको दक्षिणी भेग देवागन्ज गाउँपालिकाका किसान काँक्रा नबिकेर हैरान बनेका छन् । काँक्राको भाउ दुई रुपैयाँ पनि नलागेपछि देवानगन्जका किसान इन्तु न चिन्तु बनेका हुन् ।
देवानगन्ज–२ का किसान रामवृक्ष मेहताले आफ्नो १० कठ्ठा जमिनमा काँक्रा खेती गरेका छन् । काँक्रा रोपेर फलेयता क्रमशः बिक्रीमा गिरावट आएको बताउँदै उनले पछिल्लो समय दुई रुपैयाँ किलोमा पनि बिक्री नभएको दुःखेसो पोखे ।
‘श्रमिकलाई लगाएर हप्तामा सय मनजति टिप्दै आएको छु,’ उनी भन्छन्, ‘पछिल्लो १५–२० दिनदेखि बिक्री घटेको छ । अहिले सबैतिरका व्यापारीलाई फोन गरेर बिक्रीका लागि अनुरोध गरेको छु, तर बिक्री नै भइरहेको छैन ।’
शुक्रबार (आज) चार जना श्रमिकलाई ज्याला दुई हजार रुपैयाँ तिरेर काँक्रा टिपेको उनले बताए । तर, बिक्री नभएपछि अन्योलमा परेको उनको गुनासो छ ।
नजिकै रहेको देवानगन्ज बजारमा काँक्रा बिक्री नभएपछि मेहताले जोखिम मोलेर धरान पठाउन लागेका छन् । उनका अनुसार मागभन्दा उत्पादन बढी भएका कारण काँक्रा बिक्री हुन छोडेको हो । ‘हाम्रो बजारमा खपत ५ टन छ, उत्पादन १५ टन । यसैले पनि काँक्रा बिक्री हुन छोडेको जस्तो लाग्छ ।’
कृषि क्रान्तिको भूमि भनेर चिनिने देवानग्नजमा करिब ५० बिघामा काँक्रा उत्पादन हुने गरेको छ । अहिले धरानलगायत अन्य ठाउँमा काँक्राको दाम १२ रुपैयाँ प्रतिकिलो भए पनि देवानगन्जका किसानले बजार पाएका छैनन् ।
