कैलाली । कैलालीको घोडाघोडी नगरपालिका-८ का निरजबहादुर शाहीको स्थानीय मेडिकलमा सुई लगाएको दुई मिनेटमा निधन भएको छ ।
३५ वर्षीय शाही सोमबार बिहान टाउको दुखेपछि नजिकै रहेको दहित मेडिकलमा पुगेका थिए ।
उक्त मेडिकल सञ्चालक ईन्द्र दहित काठमाडौं गएको अवस्थामा मेडिकलमा कार्यरत ल्याब असिस्टेन्ट महाबीर चौधरीले जन्डिस छ भन्दै सुई लगाएको केही समयमै शाहीको निधन भएको प्रत्यक्षदर्शीले बताए ।
झाडापखालको उपचार गराउन गएका सोही ठेगाना भएका खडक बहादुर साउँदले भने, “मलाई सलाइन चढाएपछि निरज भाईलाई एउटा इन्जेक्सन दिइएको थियो । इन्जेक्सन दिने वित्तिकै खोक्न थाल्नुभयो । खोक्दा खोक्दै मुखबाट फिज आयो । एकछिनमा छटपटिन थाल्नुभयो, मुखबाट फिजसहितको लहरा जस्तो फाल्नुभयो ।”
बिरामीको अवस्था एक्कासि छटपटिएको देखेपछि साउँदले के भयो भन्दै प्रश्न गरे ।
चिकित्सकले कसैकसैलाई इन्जेक्सनले यस्तै हुन्छ भन्दै मुखबाट कृतिम श्वास दिने प्रयास गरेपनि उनको मृत्यु भइसकेको प्रत्यक्षदर्शी साउँदले सुनाए ।
मृतक शाहीका ससुरा रामबहादुर शाहीले बिहानसँगै खाजा खाएर ज्वाई मेडिकल गएको बताए ।
“सँगै चिया खाजा खाएर छोराछोरी स्कुल छोडेर टाउको दुखेको छ भन्दै मेडिकल जानुभएको हो । एकै छिनमा मृत्युको खबर सुन्न पर्यो । केही नभएको मेरो ज्वाइँको मृत्यु कसरी भयो ? सुइलगाउने मान्छे किन भाग्यो ? हामिलाई न्याय चाहिन्छ,” उनले भने ।
निरजको निधन भएको केहीछिनमै ल्याव असिस्टेन्ट चौधरी भागेका छन् ।
घटना भएलगतै फरार चौधरीको खोजी कार्य भइरहेको मेडिकल सञ्चालक ईन्द्र दहितले जानकारी दिए ।
शव पोष्टमार्टमका लागि पठाउने तयारी भएको डिएसपी अवस्थीले जानकारी दिए ।
