उर्लाबारी । एसियन हाइवेका रूपमा विस्तार भइरहेको पूर्वपश्चिम राजमार्गमा अपेक्षाअनुसार प्रगति हासिल नभएको पाइएको छ ।
एसियाली विकास बैंकको सहयोगमा निर्माणाधीन यो सडक २०८० कात्तिक २ गते सम्झौता भई माघ १९ गतेदेखि काम सुरु भएको थियो ।
तर, निर्माण सुरु भएको १३ महिना भइसक्दा पनि १५ प्रतिशत मात्रै भौतिक प्रगति भएको हो ।
आयोजना निर्देशनालय (एडिबी) का निर्देशक चुडाराज ढकालले यो अवधिमा २० प्रतिशत भौतिक प्रगतिको अपेक्षा गरिएको भए पनि सोचेअनुसार प्रगति नभएको बताए ।
ग्रामीण र जंगल क्षेत्रमा लक्ष्यअनुसार नै प्रगति भइरहेको छ तर सहरी क्षेत्रमा विद्युत् पोल र घरटहरा हटाउन धेरै झमेला भइरहेकाले प्रगति सन्तोषजनक नभएको हो ।
यद्यपि अघिल्ला तीन महिनाभन्दा भौतिक प्रगतिदर बढ्दै गएको निर्देशक ढकालले बताए ।
सरकारले ऋण लिएर सडक निर्माण गरिरहेकाले अर्बौं रुपैयाँ खर्च भइरहेको छ ।
स्थानीय उपभोक्ताले भने सडक पूर्वाधारमा लगानी भएको विषय बुझेको देखिँदैन । काँकडभिट्टाबाट इटहरीको दुरी पार गर्न साढे दुई घण्टा लाग्छ ।
एक घण्टामा यो दुरी पार गर्न सकियोस् भनेर सडक विस्तार गरिएको निर्देशक ढकालले जानकारी दिए ।
आयोजनाको पश्चिम कार्यालयका प्रमुख जगत प्रजापतिका अनुसार काँकडभिट्टा–लौकही सडक योजना (पश्चिम खण्ड) अन्तर्गतको प्याकेज नम्बर २, ३ र ५ को भौतिक प्रगति क्रमशः १८, ९ र १५ प्रतिशत रहेको छ ।
यस्तै वित्तीय प्रगति क्रमशः १५, ७.५ र १२.५ प्रतिशत रहेको छ ।
प्याकेज नम्बर ५ अन्तर्गतको मुख्य पुलको फाउन्डेसनको पाइल निर्माणको काम अन्तिम चरणमा पुगेको छ ।
पुलको जमिनमुनिको काम वर्षायाम सुरु हुनुअगावै सक्ने गरी काम भइरहेको योजना प्रमुख प्रजापतिले जानकारी दिए ।
त्यसैगरी प्याकेज नम्बर २ अन्तर्गतको सबै साना पुलहरूको पाइल निर्माण सकिएको छ ।
प्याकेज नम्बर ३ मा केही पाइल निर्माण गर्न बाँकी छ ।
सडकको दुवै प्याकेजमा साइड ड्रेन, रिटेनिङ वाल, कलभर्ट, माटो फिलिङ र सबबेसको कार्य तीव्र गतिमा भइरहेको छ ।
प्याकेज दुईको बेलबारीपूर्व सुनझोडासम्मको बजारबाहेक जङ्गल क्षेत्रमा बर्सातअगाडि नै कालोपत्रे गर्ने लक्ष्यका साथ काम अगाडि बढिरहेको छ ।
सडकमा पर्ने ३९ वटा कलभर्ट निर्माण भइसकेका छन् भने ५२ वटा कलभर्ट निर्माणाधीन अवस्थामा रहेका छन् ।
