विराटनगर । विद्यार्थीलाई नेतृत्व निर्माण गर्ने थलोको रूपमा चिनिएको त्रिभुवन विश्वविद्यालयको स्वतन्त्र विद्यार्थी युनियन (स्ववियु) निर्वाचन आज देशभरिका अधिकांश क्याम्पसमा हुँदै छ ।
त्रिविले प्रत्येक दुई–दुई वर्षमा गर्ने स्ववियु निर्वाचन मंगलबार भइरहेको छ ।
निर्वाचनका लागि विभिन्न राजनीतिक दलनिकटका विद्यार्थी संगठनलाई विद्यार्थीहरूले मत दिइरहेका छन् ।
यसबीचमा ६७ वर्षीय एक वृद्धले स्ववियु निर्वाचनमा मतदान गरेका छन् ।
महेन्द्र विन्देश्वरी बहुमुखी क्याम्पस राजविराजको स्वतन्त्र विद्यार्थी युनियनको निर्वाचनमा मतदाता रहेका ६७ वर्षीय निर्भयकान्त झाले मतदान गरेका हुन् ।
झाले मंगलबार बिहान मतदाताको लाइनमा सबैभन्दा अघि उभिएर मत खसालेका हुन् ।
झा मतदाताको लाइनमा रहँदा उम्मेदवारहरू उनीनजिक झुम्मिएका थिए ।
सप्तरीको तिलाठी घर भएका झाले पढाईलाई उमेरले नछेक्ने बताउँदै एउटा विद्यार्थीको हैसियतमा मताधिकारको प्रयोग गरेको बताए ।
