विराटनगर । विराटनगर महानगरपालिका–५ कृषिभवन/मुनालपथमा अवस्थित किड्स भिलेज स्कुलमा चार दिने वार्षिक स्पोर्ट्स मिटका विजेताहरूलाई पुरस्कार वितरण गरिएको छ ।
गत माघ अन्तिममा भएको स्पोर्ट्स मिटका विजेता विद्यार्थीहरूलाई बुधबार एक कार्यक्रमको आयोजना गरी पुरस्कृत गरिएको हो ।
माघ २६ गतेदेखि ३० गतेसम्म स्कुलले विभिन्न रोचक तथा शैक्षिक खेलहरू खेलाएको थियो ।
विद्यालयले स्थापनाकालदेखि नियमित रूपमा आयोजना गर्दै आएको स्पोर्ट्स मिटमा स्कुलका सबै विद्यार्थीको अनिवार्य सहभागिता थियो ।
यस वर्षको खेलकुदमा गणित खेल, ड्रयाग द बल, आकृति मिलाउने, खरायो दौड, कार रेसिङ, क्रिकेट, फुटबल, बाधा दौड, भ्यागुतो दौड, बोरा दौड, तीन खुट्टे दौड, धागो र सियो, टावर निर्माण र रिले जस्ता विविध खेलहरू समावेश गरिएका थिए ।
जसका विजेता विद्यार्थीहरूलाई आज पुरस्कार वितरण गरिएको किड्स भिलेजका प्रिन्सिपल विजय दाहालले जानकारी दिए ।
उनीहरूलाई अन्तर्राष्ट्रिय क्रिकेट अम्पायर बुद्धिबहादुर प्रधान, स्कुलका अध्यक्ष मदन खतिवडा, प्रिन्सिपल विजय दाहाल, प्रबन्ध निर्देशक पंकज जैन, नवजीत प्रधान, आलमगिर रैन, अभिनाश देव, पत्रकार विजय खतिवडा तथा शिक्षक-शिक्षिकाहरूले पुरस्कृत गरे ।
आज कक्षा १ देखि सातसम्मका विद्यार्थीहरूलाई पुरस्कृत गरिएको छ भने प्ले ग्रुपका विद्यार्थीहरूलाई अर्को दिन पुरस्कार वितरण गरिने बताइएको छ ।
