विराटनगर । विश्वभर छरिएर रहेका सेफ (भान्से) हरू आगामी नयाँ वर्षमा काठमाडौंमा भेला हुने भएका छन् ।
आगामी वैशाखको पहिलो साता संघीय राजधानी काठमाडौंमा सेफहरूको सम्मेलन हुने भएको हो ।
सरकारको परराष्ट्र मन्त्रालयमा दर्ता भएको सेफ सोसाइटी नेपालले २०८२ वैशाख ६ शनिबार काठमाडौंमा सम्मेलन आयोजना गर्न लागेको हो ।
इन्टरनेसनल नेपाली सेफ सोसाइटी क्यानाडाका अध्यक्ष दिपक कार्कीकाअनुसार त्यस अवसरमा विश्वभर छरिएर रहेका नेपाली सेफहरू सेतो सेफ कोटसहित एकै स्थानमा भेला हुनेछन् ।
कार्यक्रममा करिब ५ हजार सेफ प्रतिनिधिहरू सहभागी गराइने लक्ष्य रहेको उनले जानकारी दिए ।
पर्यटन मन्त्रालय र पररास्ट्र मन्त्रालयको सहयोगमा हुने सम्मेलनको उद्देश्य नेपाली सेफहरूलाई एकताबद्ध गराउनु रहेको जनाइएको छ ।
यसैगरी, नेपाली खाना संस्कृतिलाई विश्वभर प्रवर्द्धन गर्न उक्त सम्मेलनले सहयोग पुग्ने विश्वास आयोजकको छ ।
सेफहरूको पेशागत चुनौती र अवसरहरूबारे पनि छलफल गरिने भएको छ ।
त्यस अवसरमा विभिन्न परिकारका ४० वटा स्टल राखिने छ ।
ती स्टलहरूमा नेपाली सेफहरूले अन्तर्राष्ट्रिय बजारमा तयार पार्ने खानाको स्वाद लिन पाइने छ ।
कार्यक्रममा विभिन्न सेफ अवार्ड प्रदान गरिने छ भने चर्चित कलाकारहरूको सहभागितामा सांगीतिक कार्यक्रम पनि हुनेछ ।
त्यस अवसरमा सेफहरूका लागि नयाँ कौशल र प्रविधिको ज्ञान, सेफ अवार्डः उत्कृष्ट सेफहरूलाई सम्मान, सोसाइटीको किताब विमोचन र लोपोन्मुख संस्कृतिका झाँकी प्रस्तुत गरिने छ ।
उक्त भेलाले विश्वभरका सेफहरूको उपस्थितिमा आगामी कार्यकालका लागि नयाँ नेतृत्व चयन गर्नेछ ।
भेलाका अवसरमा ‘भान्से महासङ्ग्राम २०८२’ कलेज स्तरको ‘कुकरी’ प्रतियोगिता आयोजना हुनेछ भने यो पेशामा कम्तिमा ६ वर्ष काम गरेको सेफलाई सदस्यता तथा प्रमाणपत्र दिइने छ ।
सम्मेलनलाई नेपाली सेफहरूको प्रथम महाधिवेशनका रूपमा लिइएको छ। सम्मेलनको संयोजकमा सेफ अरुण अधिकारी छन् ।
सन् २०१८ मा युएईबाट सुरु भएको सेफ सोसाइटी अहिले नेपाललगायत ३६ देशमा संगठित भइसकेको छ ।
नेपाल सेफ सोसाइटी युएईका पूर्व महासचिव दीपक कार्कीको अध्यक्षतामा कार्यसमिति छ ।
