विराटनगर । कोशी प्रदेशका सभामुख अम्बरबहादुर विष्टले जात र वर्गको आधारमा छुवाछूत गर्न नहुने कानुनमा उल्लेख भए पनि ब्यवहारमा अझै लागू हुन नसकेको बताएका छन् ।
सोमबार विराटनगरमा दलित महिला संघले आयोजना गरेको दुईदिने दलित महिला सशक्तीकरण र समावेशीकरणको सवाल विषयक प्रदेशस्तरीय कार्यक्रममा उनले यस्तो बताएका हुन् ।
विष्टले सरकारले दलित र गैर दलितबीचको खाडललाई पुर्न हरेक मठ-मन्दिरमा दलित पूजारी राखियो भने केही हदमा विभेद अन्त्य हुने बताए ।
उनले भने, ‘छुवाछूत हटाउन सरकारले हरेक मन्दिरमा दलित पूजारी राख्नुपर्छ । कानुनीकै अभाव भएर दलित वर्गको उत्थान भएको छैन, भने सरोकारवालहरू यो कुरामा सचेत भएर अगाडि बढ्नुपर्छ ।’
आन्तरिक मामिला तथा कानुनमन्त्री रेवतीरमण भण्डारी समाजमा अहिले पनि दलित र गैर दलितबी विभेद कायम नै रहेको बताए ।
कार्यक्रमका दलित अगुवाहरूले छुवाछूत अन्त्य गर्ने विषय कानुनमा उल्लेख भए पनि अहिलेसम्म ब्यवहारमा लागू हुन नसकेको बताए ।
ब्यवहारमा सुधार नभएसम्म समाज र परिवारमा सुधार न आउने भएकोले सबैभन्दा पहिले विभेद र छुवाछूत ब्यवहारबाट हटाउनुपर्नेमा उनीहरूको जोड थियो ।
दलित महिला संघकी केन्द्रीय अध्यक्ष कला स्वर्णकारले राज्यले ब्यवस्था परिवर्तन गरे पनि दलितहरूको अवस्था भने परिवर्तन हुन नसकेको बताइन् । उनले दलित समुदायले पनि दलितको सरकार हो भन्ने अनुभूति गर्न पाउने काम गर्न आग्रहसमेत गरिन् ।
