विराटनगर । विश्वका अरू देशहरूजस्तै दक्षिण कोरियामा पनि जन्मदर घट्दो अवस्थामा छ ।
तीव्र गतिमा घटिरहेको जन्मदरका कारण कोरियन सरकार चिन्तामा छ ।
यस समस्यालाई रोक्न सरकारले गरेका विभिन् प्रयासहरू अहिलेसम्म पर्याप्त सफल हुन सकेका छैनन् ।
जन्मदर घट्दो अवस्थामा रहेको कोरियाको कुल जनसंख्याको २० प्रतिशत त वृद्ध–वृद्धा छन् ।
दक्षिण कोरियाको कुल जनसंख्याको पाँच जनामा एक जना ६५ वर्ष वा सोभन्दा माथिको उमेरको छ ।
देशको जनसंख्याको २० प्रतिशतभन्दा बढी ६५ वर्ष माथिका नागरिक भएपछि कोरिया सबैभन्दा बढी वृद्ध–वृद्धा भएको जापानपछिको दोस्रो देश पनि बनेको छ ।
सोमबारसम्म कोरियाको कुल जनसंख्या ५१.२२ मिलियनमध्ये १०.२४ मिलियन नागरिक ६५ वर्ष वा सोभन्दा माथिका छन् ।
यता, कोरिया विश्वकै सबैभन्दा कम जन्मदर भएको देश पनि हो ।
कोरियाको कुल प्रजनन दर (एक महिलाले जीवनकालमा जन्म दिने बच्चाको औसत संख्या) सन् २०१८ देखि १.० भन्दा कम छ ।
जन्मदर बढाउनका लागि कोरियन सरकार नै जोडी खोज्ने काममा संलग्न छ ।
त्यसबाहेक स्याम्सुङ, एलजी, ह्युन्डाई मोटर र एसके जस्ता ठूला कम्पनीहरूले कर्मचारीहरूलाई उदार मातृत्व बिदा दिने र बच्चा जन्माउने महिलाहरूलाई प्रोत्साहन दिने जस्ता प्रयासहरू गरेका छन् ।
तर पनि ती प्रयासहरूले अहिलेसम्म खासै सफलता पाउन सकेका छैनन् ।
दक्षिण कोरियाले विगत केही वर्षदेखि आफ्ना युवाहरूलाई सन्तान जन्माउन प्रोत्साहित गर्नका लागि अनगिन्ती पहल गरेको छ, तर यस प्रयासको अझै सफलता हात पारेको छैन ।
२०२३ को अन्त्यसम्म, दक्षिण कोरियाको जन्मदर प्रति हजार जनसङ्ख्या ०.७५ रहेको थियो । जुन विश्वभरिका सबैभन्दा कम जन्मदरमध्ये एक हो ।
दक्षिण कोरियामा जन्मदर कम हुनुको पछाडि एक महत्त्वपूर्ण कारण भनेको युवा पुस्तामा विवाहप्रति सकारात्मक धारणा नहुनु हो ।
धेरै युवाहरूले विवाह र परिवारको जिम्मेवारीबाट बच्न चाहन्छन्, जसले गर्दा जन्मदरमा थप गिरावट आएको छ ।
यसैले पनि विवाहका लागि जोडी खोजिदिने निजी कम्पनीहरू सञ्चालनमा रहेको धेरै भइसक्यो ।
अब भने त्यहाँको सरकारले नै युवायुवतीलाई भेट गराई विवाहतर्फ अगाडि बढाउने उद्देश्यले ‘डेटिङ’ कार्यक्रम आयोजना गर्न थालेको छ ।
अत्यधिक न्यून प्रजनन र विवाहदरसँग जुधिरहेको दक्षिण कोरियामा जोडीहरूबीच हुने भेटवार्ताले नयाँ बाटो अपनाएको छ ।
जोडी मिलाइदिन भइरहेका यस्ता अस्वाभाविक शैलीले दक्षिण कोरियामा विवाह र जन्मदर बढाउनेमा त्यहाँको सरकार विश्वस्त छ ।
