विराटनगर । आसन्न उपनिर्वाचनमा मोरङको ग्रामथान गाउँपालिका अध्यक्षका लागि राजेन्द्र लिङदेन अध्यक्ष रहेको राष्ट्रिय प्रजातन्त्र पार्टी (राप्रपा) र राष्ट्रिय स्वतन्त्र पार्टी (रास्वपा) ले मनोनयन दर्ता गराएका छन् ।
आइतबार गाउँपालिकास्थित मुख्य निर्वाचन अधिकृतको कार्यालयमा पुगेर राप्रपाका दिनेशकुमार (दिवेश) थन्दार र रास्वपाका नवीनकुमार विश्वासले उम्मेदवारी दर्ता गराएका हुन् ।
३० वैशाख २०७९ को चुनावबाट निर्वाचित नेपाली कांग्रेसका जयप्रकाश गच्छदार थारूको निधनपश्चात ग्रामथानमा उपनिर्वाचन हुन लागेको छ ।
मंसिर १६ गते हुने निर्वाचनका लागि उनीहरूले मनोनयन दर्ता गराएका हुन् ।
केन्द्रीय नेताहरू प्रल्हाद साह, दिनेश साहलगायतका नेता–कार्यकर्तासहित मुख्य निर्वाचन अधिकृतको कार्यालयमा पुगेर थन्दारले उम्मेदवारी दर्ता गराएका हुन् ।
ग्रामथानमा राप्रपाका थन्दार मनोनयन दर्ता गराउने पहिलो उम्मेदवार बनेका छन् ।
यसैगरी, नेपाली कांग्रेसका बलराम सरदार, नेकपा एमालेका तुलसीराम विश्वास र नेकपा माओवादी केन्द्रका नमोनारायण माझीले आजै मनोनयन दर्ता गराउने छन् ।
त्यसबाहेक एकीकृत समाजवादीले दिलबहादुर विश्वकर्मा र एमाले छोडेका स्वतन्त्र उम्मेदवार नेमनारायण माझीले पनि मनोनयन दर्ता गराउने छन् ।
ग्रामथानमा २६ हजार ४४ मतदाता छन् ।
दुई वर्षअघि भएको निर्वाचनमा एमालेका शिवनारायण माझीलाई हराउँदै कांग्रेसका गच्छदार अध्यक्षमा निर्वाचित भएका थिए । तर, १० माघ २०८० मा ब्रेन ह्यामरेज भएर थलिएका गच्छदारको गत असार ३ गते निधन भएको थियो ।
त्यसयता, उपाध्यक्ष गुणावतिदेवी थारूले कार्यबाहक अध्यक्षको जिम्मेवारी सम्हाल्दै आएकी छन् ।
