default विराटनगर । मोरङको ग्रामथान गाउँपालिकामा तीन जना सवार मोटरसाइकललाई अर्को मोटरसाइकलले ठक्कर दिएर भागेको छ ।
बिहीबार बिहान ११ः५० बजेतिर ग्रामथान-७ मा तेतरियाबाट विराटचोककतर्फ जाँदै गरेको नम्बर नखुलेको मोटरसाइकलले सोही दिशातर्फ जाँदै गरेको बा ५१ प ८८१२ नम्बरको मोटरसाइकललाई पछाडिबाट ठक्कर दिएको थियो ।
८८१२ नम्बरको मोटरसाइकलमा तीन जना सवार रहेका थिए । मोटरसाइकल चालकसँग सवारी चालक अनुमतिपत्रसमेत साथमा थिएन । ठक्कर दिने मोटरसाइकल फरार बनेको छ ।
दुर्घटनामा मोटरसाइकल चालक बेलबारी नगरपालिका-५ बस्ने २३ वर्षीय विकास बस्नेत, बीचमा सवार उनकी आमा ५६ वर्षीय भीमकुमारी र पछाडि सवार उनकी दिदी ३३ वर्षीय ईश्वरी बस्नेत घाइते भएका हुन् ।
उनीहरू तीनै जनाको अवस्था सामान्य रहेको छ । घाइतेहरूलाई उपचारको लागि नगर अस्पताल सुन्दरहरैंचामा पठाइएको छ । ठक्कर दिएर भाग्ने मोटरसाइकल प्रहरीले खोजिरहेको छ ।
