विराटनगर । आठौं संस्करणको मिस कोशीका विजेता प्रतियोगीहरूलाई विराटनगरमा सम्मान गरिएको छ । बिहीबार विराटनगर महानगरपालिका-४ कञ्चनबारीस्थित होटल ह्वाइट हाउसमा मिस कोशी २०२४ का विजेता प्रतियोगीहरूलाई सम्मान गरिएको हो ।
कोशी प्रदेश सरकारका खानेपानी, सिचाइँ तथा ऊर्जा मन्त्री एकराज कार्कीले मिस कोशीका प्रतियोगीहरूलाई सम्मान गरेका हुन् ।
मिस कोशी बन्न सफल शुभलक्ष्मी राई, फर्स्ट रनरअप निशा हाङ्मा लिम्बु, सेकेन्ड रनरअप निलम मोक्तान तामाङ, थर्ड रनरअप कृति बस्नेत र पाँचौं स्थान ओगट्न सफल स्वस्तिका राई सम्मानित बनेका हुन् ।
कार्यक्रममा बोल्दै मन्त्री कार्कीले कला र संस्कृतिको उत्थानका लागि भएको मिस कोशीले नवप्रतिभाको उजागर हुनेमा आफू विश्वस्त रहेको सुनाए ।
‘पछिल्ला केही दिनहरूमा यस्ता ब्युटी प्याजेन्टहरूमा विकृति बढेकाले सुन्दरी प्रतियोगिता नगरौं भन्ने आवाज नउठेका होइनन् । तर, नवप्रतिभाहरू यस्तै इभेन्टहरूमार्फत् उजागर हुनेहुँदा पनि विकृति निराकरण गरी मौलिकता र आफ्नै संस्कृति मिसाएर यस्ता प्रतियोगिता हुन जरुरी छ जस्तो मलाई लाग्छ,’ उनले भने ।
जय मिडिया म्यानेजमेन्टको आयोजनामा आठौं संस्करणको मिस कोशी प्रतियोगिताको फाइनल धरानमा भएको थियो । गत असार २९ गते धरानमा भएको फाइनलमा २४ जना प्रतिस्पर्धीलाई उछिन्दै इटहरीकी शुभलक्ष्मी राई विजेता बनेकी थिइन् ।
धरानकी निशा हाङ्मा लिम्बू फर्स्ट रनरअप हुँदा झापाकी निगम मोक्तान सेकेन्ड रनरअप, जुम्ला घर भएकी कृति बस्नेत थर्ड रनरअप हुँदा चौथो रनरअप इटहरीकी स्वस्तिका राई बनेकी थिइन् ।
पहिलो बनेकी नगद एक लाख रुपैयाँ नगद पाउने भएकी छन् भने उनीसँगै अरू विजेताहरूले क्राउन ट्रफीलगायत अन्य विभिन्न उपहार पाउने भएका छन् ।
विजेताहरूलाई प्रायोजकले घोषणा गरेअनुरूपका पुरस्कारहरू चाँडै उपलब्ध गराइने आयोजक संस्था जय मिडिया म्यानेजमेन्टका अध्यक्ष जयराज रोयले जानकारी दिए ।
सन् २०१४ बाट निरन्तर रूपमा प्रतियोगिताको आयोजना गरिरहेको बताउँदै उनले घोषित् पुरस्कार अघिल्ला संस्करणका विजेताहरूले पाएको र यसपालिका विजेताहरूले पनि पाउने दाबी गरे ।
‘मिस कोशी सुन्दरी प्रतियोगितामात्र होइन, सामाजिक उत्तरदायित्व सिकाउने एउटा प्लेटफर्म हो,’ उनले भने, ‘हामी हाम्रै संस्कार, संस्कृति र परिवेशबारे प्रतियोगीहरूलाई सिकाउँछौं । जहाँसम्म पुरस्कार नपाएको गुनासोको कुरा छ, कहिँकतै त्यस्तो आएको हुनसक्छ । तर, प्रायोजकबाट हामी दिलाएरै छोड्छौं ।’
उनका अनुसार यसपालि प्रतियोगितमा एक सय ५० जना प्रतिस्पर्धीले भाग लिएकोमध्ये २५ जना फाइनल पुगेका थिए । विशेषगरी ११/१२ कक्षा पढ्दै गएका युवतीहरू यस्ता प्रतियोगितामा सहभागी हुनेगरेको सुनाउँदै उनले मिस कोशी आफ्नो करिअर डेभलप गर्ने विषयमा कोशेढुंगा साबित हुने बताए ।
मिस कोशी विजेता शुभलक्ष्मी राईले उपाधि जितेसँगै मिस युनिभर्सका लागि तयारीमा रहेको सुनाइन् । ‘अहिले म पढ्दै छु । यो प्रतियोगिताले मलाई थप हौसला दिएको छ । आफ्नो गाउँठाउँलाई चिनाउन पाउँदा र अरूमाझ चिनिन पाउँदा गर्व महसुस गरेकी छु । अब मिस युनिभर्सका लागि तयारीमा छु,’ उनले भनिन् ।
उनले पुरस्कार राशि र विभिन्न उपहारहरू पाउनेक्रममा रहेको सुनाइन् ।
फर्स्ट रनरअप निशा लिम्बुले मिस कोशी प्रतियोगितामा प्रतियोगी बन्दा आफूमा आत्मविश्वास बढेको बताउँदै आगामी दिनमा यसै क्षेत्रबाट समाजमा सक्रिय रहने प्रतिबद्धता जनाइन् ।
