काठमाडाैं । आफू नेपाल प्रहरी भएको र सिपाहीमा जागीर लगाइदिने भन्दै ठगी गर्ने नक्कली प्रहरी पक्राउ परेकी छन् ।
पक्राउ पर्नेमा बैतडीको पुर्चौडी नगरपालिका-६ घर भई काठमाडौंको चन्द्रागिरि नगरपालिका–१४, नैकापमा डेरा गरी बस्ने २४ वर्षीया अमिलाकुमारी साउद रहेकी छन् ।
उनलाई सोमबार दिउँसो पक्राउ गरिएको जिल्ला प्रहरी परिसर काठमाडाैंले जानकारी दिएको छ ।
माघ २९ गते साँझ ५ बजेतिर चन्द्रागिरी नगरपालिका-१४ नैकापमा प्रहरी हुँ भनी ठगी गर्ने मानिस रहेको भन्ने सूचनाका आधारमा उनलाई प्रहरीले पक्राउ गरेको हो ।
प्रहरी वृत्त थानकोटबाट प्रहरी टोलीले अमिलालाई उनकै डेराबाट नियन्त्रणमा लिएको थियो ।
उनले दैलेखको नारायण नगरपालिका-११ बस्ने २६ वर्षीया अमृता विष्टलाई राष्ट्रिय अनुसन्धान विभागको सिपाही पदमा जागिर लगाइदिने भन्दै ठगी गरेको खुलेको छ ।
आफू नेपाल प्रहरी (जनपद) को प्रहरी सहायक निरीक्षक भएको र बढुवा भई प्रहरी नायब निरीक्षक भएको भन्दै पोसाक लगाएर देखाउँदै ठगी गरेकी थिइन् ।
अमिलाले अमृता विष्टसँग एक लाख ५० हजार रुपैयाँ नगद रकम लिएको खुलेको प्रहरीले जनाएको छ ।
उनको साथबाट नेपाल प्रहरीको पोसाक एक जोर, प्रहरी सहायक निरीक्षकको दर्ज्यानी चिह्न एक थान, नेमप्लेट एक थान, बुट एक जोर, बेल्ट एक थान र मोबाइल एक थान समेत बरामद गरिएको जनाइएको छ ।
