काठमाडौं । सरकारले बालकुमारी घटनामा ज्यान गुमाएका सुजन रावत र वीरेन्द्र साहको परिवारलाई जनही १० लाख रुपैयाँ राहत उपलब्ध गराउने भएको छ ।
शनिबार बालुवाटारस्थित प्रधानमन्त्री निवासमा बसेको मन्त्रिपरिषद्को आकस्मिक बैठकले सो घटनाका मृतक सुजन र वीरेन्द्रको परिवारलाई १०-१० लाखका दरले राहत उपलब्ध गराउने निर्णय हो ।
कोरिया जानका लागि रोजगार अनुमति प्रणाली (इपिएस) परीक्षा दिन नपाएपछि युवाहरूले गरेको प्रदर्शनपछिकाे झडपमा उनीहरूको मृत्यु भएको थियो ।
शुक्रबार ललितपुरको बालकुमारीमा भएको विरोध प्रदर्शनमा प्रहरीसँगको झडपमा दैलेखका २३ वर्षीय सुजन र डोटीका २२ वर्षीय वीरेन्द्रको ज्यान गुमाएका थिए ।
उक्त घटनाप्रति गहिरो दुःख व्यक्त गर्दै मन्त्रिपरिषद् बैठकले मृतकका परिवारलाई १० लाखका दरले राहत उपलब्ध गराउने निर्णय गरिएको नेपाल सरकारका प्रवक्तासमेत रहेकी सञ्चार तथा सूचना प्रविधिमन्त्री रेखा शर्माले जानकारी दिइन् ।
बैठकले मृतकहरुप्रति श्रद्धाञ्जली अर्पण गर्दै शोक सन्तप्त परिवारजनमा समवेदनासमेत व्यक्त गरेको छ ।
त्यसैगरी, मन्त्रिपरिषद् बैठकले सो घटनामा परी घाइते भएकाको सम्पूर्ण उपचार खर्च पनि सरकारले व्यहोर्ने निर्णय गरेको पनि सञ्चारमन्त्री शर्माले बताइन् ।
सो घटनामा निष्पक्ष छानबिन गरेर दोषीलाई कडा कारबाही गर्न र आगामी दिनमा त्यस्ता प्रकृतिका घटना हुन नदिन पनि गृह मन्त्रालयलाई मन्त्रिपषिद बैठकले सचेत गराएको छ ।
सरकारले सो घटनालाई संयमतापूर्वक लिएर शान्ति सुरक्षाको वातावरण बिग्रन नदिन पनि सबैलाई अपिल गरेको छ।
