प्रधानमन्त्री शेरबहादुर देउवाले प्रमुख प्रतिपक्षी नेकपा (एमाले) का अध्यक्ष केपी शर्मा ओलीसँग भेट गर्न बालकोट पुगेका छन् ।
सत्तारूढ गठबन्धनका दलहरूको बैठक सकिएलगत्तै देउवा ओलीलाई भेट्न ओली निवास बालकोट पुगेका हुन् ।
एमाले अध्यक्ष ओलीका प्रेस संयोजक रामशरण बजगाँईका अनुसार आधा घन्टादेखि उनीहरूबीच छलफल जारी छ ।
केहीबेरअघि बालुवाटारमा सकिएको सत्तारूढ गठबन्धनको बैठकलगत्तै प्रधानमन्त्री देउवा पत्नी आरजु देउवा राणासहित ओलीलाई भेट्न बालकोट गएका हुन् ।
अहिले देउवा र ओलीबीच बालकोटमा कुराकानी भइरहेको बताइएको छ ।
सत्तारूढ गठबन्धनमा रहेका नेकपा (माओवादी केन्द्र) र नेकपा (एकीकृत समाजवादी) ले एमसिसी संसदबाट पारित गर्न सहयोग नगर्ने भएपछि प्रधानमन्त्री देउवाले प्रमुख प्रतिपक्षी एमालेसँग संवाद बढाएका थिए ।
सत्तारूढ गठबन्धनको बैठक शुक्रबार बिहान १० बजे फेरि बस्ने भएको छ ।
बिहीबार अपराह्न गठबन्धनको बैठक बस्नुअघि मन्त्रिपरिषद् बैठक बसेको थियो ।
अमेरिकी सहयोग सम्बन्धी परियोजना एमसिसी सम्झौता अनुमोदन गर्ने विषयमा शीर्ष नेताहरूबीच दाैडधुप भइरहेको छ ।
प्रधानमन्त्री देउवाले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बिहीबार बिहान भेट गरेका थिए ।
दिउँसोतिर प्रचण्डले सिंहदरबारमा नेकपा (एकीकृत समाजवादी) पार्टीका अध्यक्ष माधवकुमार नेपालसँग एमसिसीका विषयमा छलफल गरेका थिए ।
एमसिसीलाई निकास दिने विषयबाहेक सत्ता गठबन्धन बचाउनेबारे पनि शीर्ष नेताहरूबीच छलफल भइरहेको छ ।
माओवादीको चेतावनी: संशाेधन नगरी एमसिसी अघि बढाए गठबन्धन तोडिने
