दर्शकको भीडले सुनसरीको बर्जु महोत्सव स्थलमा तोडफोड र आगजनी गरेका छन् ।
सुनसरीको बर्जु तालको छेउमा लगाइएको महोत्सवमा आयोजकले बोलाएको कलाकार नआएपछि महोत्सव स्थलमा कार्यक्रम हेर्न पुगेका दर्शकको भीडले तोडफोड र आगजनी गरेको हो । आयोजकले महोत्सवको आज अन्तिम दिन भोजपुरी कलाकार खेसरीलालको प्रस्तुति तय गरेको थियो ।
स्थानी प्रशासनले पुष २३ गतेबाट महोत्सव सञ्चालनको इजाजत दिए पनि कोरोना संक्रमण बढ्न थालेसँगै २७ गते महोत्सव बन्द गर्न परिपत्र गरेको थियो तर प्रशासनको निर्देशन विपरीत आयोजक बर्जु सामुदायीक विकास केन्द्र सुनसरीले भाेजपुरी कलाकारको प्रस्तुति तय गरी टिकट बिक्री गरेको थियो ।
महाेत्सव स्थलमा अत्यधिक भीड भएकाे थाहा पाएपछि विराटनगर आइपुगेकाे कलाकारकाे टाेलीलाई राेकेकाे थियाे । टिकटकाे पैसा तिरेर महाेत्सव स्थलमा आइपुगेर पर्खदा पनि कलाकार स्टेजमा प्रस्तुती दिन उपस्थित नभएपछि जम्मा भएकाे भीडले तोडफोड र आगजनी सुरू गरेकाे थियाे ।
आक्रोशित बनेको भीडले चारवटा भारतीय सवारी साधन र महाेत्सव स्थलमा बनाइएकाे स्टेजमा आगजनी गरेका छन् । सो घटना लगत्तै बाक्लो सङ्ख्यामा सुरक्षाकर्मी परिचालन गरि भीड नियन्त्रण गरिएको थियाे ।
क्षतिबारे यकिन तथ्याङ्क भने हालसम्म सार्वजनिक गरिएको छैन ।
