सुदूरपश्चिम प्रदेशमा फेरि कोरोना सङ्क्रमण दरमा वृद्धि भइरहेको छ ।
भारतबाट स्वदेश फर्किने नेपालीको सङ्ख्यामा वृद्धि आएसँगै पछिल्ला चार दिनदेखि सङ्क्रमणको दर बढेको हो । सुदूरपश्चिम प्रदेश, स्वास्थ्य निर्देशनालयका अनुसार पछिल्लो २४ घन्टामा प्रदेशमा एक सय ५८ जनामा सङ्क्रमण पुष्टि भएको छ ।
शुक्रबार एन्टिजेन विधिबाट एक हजार दुई सय सय ६९ जनाको परीक्षण भएकोमा एक सय एक जनामा सङ्क्रमण देखिएको निर्देशनालयले जनाएको हो ।
त्यस्तै, पिसिआर विधिबाट एक सय १६ जनाको परीक्षण भएकामा ५७ जनामा सङ्क्रमण देखिएको हो । मङ्गलबारअघिसम्म प्रदेशमा दैनिक कोरोना सङ्क्रमित थपिने क्रम १० भन्दा कम थियो । तर, गत मङ्गलबारदेखि सुदूरपश्चिम प्रदेशमा सङ्क्रमितको सङ्ख्या निरन्तर वृद्धि भइरहेको छ । मङ्गलबार ४० जना, बुधबार ५५ जना, बिहीबार एक सय २० जनामा सङ्क्रमण पुष्टि भएको थियो ।
मङ्गलबार चार दशमलव ११ प्रतिशत रहेको सङ्क्रमण दर बुधबार बढेर चार दशमलव ८८ प्रतिशत पुगेको र बिहिबार आठ दशमलव ७७ प्रतिशत पुगेको हो ।
शुक्रबार थपिएको सङ्ख्यासँगै सुदूरपश्चिममा कोरोना सङ्क्रमितको सङ्ख्या ४८ हजार ६ सय ७७ पुगेको छ । त्यस्तै, ६ सय १४ जनाको कोरोनाको कारण मृत्यु भइसकेको छ । भारतका विभिन्न स्थानबाट घर फर्किएका नेपालीहरूमा सबैभन्दा बढी सङ्क्रमण पुष्टि भइरहेको जनाइएको छ ।
