विराटनगर- नेपाली कांग्रेसका नेता डा. सुनिल शर्माले पार्टीको १५ औँ महाधिवेशनमा महामन्त्री पदमा उम्मेदवारी दिने घोषणा गरेका छन्।
शनिवार पार्टी केन्द्रीय कार्यालय सानेपामा पत्रकार सम्मेलन गर्दै शर्माले बदलिँदो राजनीतिक परिस्थितिमा कांग्रेसलाई जनतासँग प्रत्यक्ष रूपमा जोड्ने उद्देश्यसहित महामन्त्री पदमा उम्मेदवारी दिने निर्णय गरेको बताएका हुन्।
उनले दुर्गम क्षेत्रका नागरिकका समस्या र आवश्यकतालाई राजनीतिको केन्द्रमा राख्दै पार्टीलाई जनतासँग जोड्ने आफ्नो अभियान रहेको बताए। सामान्य रोगको उपचार गर्न नसक्ने तथा दुई छाक खानका लागि संघर्ष गरिरहेका नागरिकका पक्षमा काम गर्नुपर्नेमा उनले जोड दिए।
कांग्रेससँग आफ्नो लामो राजनीतिक सम्बन्ध रहेको उल्लेख गर्दै शर्माले लोकतन्त्र पुनःस्थापनाका लागि विगतमा नेपाल, भारत र अमेरिकासम्म विभिन्न तहमा राजनीतिक गतिविधि तथा लबिङ गरेको स्मरण गरे। तत्कालीन प्रधानमन्त्री एवं कांग्रेस सभापति गिरिजाप्रसाद कोइरालालाई नजरबन्दमा राखिएको समयदेखि नै लोकतन्त्र पुनःस्थापनाको पक्षमा आफूले सक्रिय भूमिका निर्वाह गरेको उनको भनाइ छ।
पत्रकार सम्मेलनमा शर्माले बीपी कोइराला र गिरिजाप्रसाद कोइरालाको राजनीतिक विरासतप्रति गर्व गर्दै कांग्रेसलाई जनतासँग जोड्ने अभियानमा महाधिवेशन प्रतिनिधिहरूको साथ मागे।
‘नेपाली कांग्रेसलाई जनतासँग जोड्ने, कांग्रेस बनाउने र कांग्रेस बनिसकेपछि देश बनाउने हाम्रो अभियान हो,’ उनले भने, ‘यो अभियानमा अग्रज, साथीहरू र देशभरबाट आउनुभएका महाधिवेशन प्रतिनिधिहरूले साथ दिनुहुनेछ भन्ने अपेक्षा गरेको छु।’
शर्मा मोरङ क्षेत्र नम्बर ३ बाट कांग्रेसको केन्द्रीय महाधिवेशन प्रतिनिधिमा निर्वाचित भएका हुन्। त्यसअघि उनी बेलबारी नगरपालिका-४ बाट क्षेत्रीय प्रतिनिधिमा सर्वसम्मत चयन भएका थिए। उनी २०५४ सालदेखि कांग्रेसको राजनीतिमा सक्रिय छन्।
कांग्रेसको १५ औँ महाधिवेशन आइतबारदेखि काठमाडौंको खुलामञ्चमा सुरु हुँदै छ।
