काठमाडौं । नेपाली कांग्रेसका राष्ट्रिय सभा सदस्य आनन्दप्रसाद ढुंगानाले पूर्वप्रधानन्यायाधीश चोलेन्द्रशमशेर जबराको पक्राउबारे प्रधानमन्त्री र गृहमन्त्रीले संसदमा जवाफ दिनुपर्ने माग गरेका छन्।
सोमबार राष्ट्रिय सभाको बैठकमा बोल्दै ढुंगानाले जबरालाई मध्यरातमा बिना जानकारी पक्राउ गरिएको भन्दै सरकारको कार्यशैलीप्रति आपत्ति जनाएका हुन्।
उनले पूर्वप्रधानन्यायाधीशको पक्राउलाई पञ्चायती शासनकालको घटनासँग तुलना गर्दै लोकतान्त्रिक व्यवस्थामा समेत यस्तो अवस्था देखिनु चिन्ताजनक भएको बताए।
ढुंगानाले सरकारमाथि कानूनको शासनको उपहास गरेको आरोप लगाउँदै समसामयिक घटनाबारे संसदलाई जानकारी गराउनुपर्ने बताए।
उनले भने, ‘दुई तिहाइको दम्भमा सरकारले स्वेच्छाचारी निर्णय लिइरहेको छ । जुनसुकै घटनामा सरकारले संसदलाई जानकारी दिनुपर्ने र जनताप्रति उत्तरदायी हुनुपर्ने संवैधानिक दायित्व बिर्सन मिल्दैन।’
जबराको पक्राउसँगै अन्य समसामयिक विषयमा समेत प्रधानमन्त्री र गृहमन्त्रीले सदनमा आएर जवाफ दिनुपर्ने उनको माग थियो।
ढुंगानाले पछिल्ला प्राकृतिक विपद्का घटनामा प्रभावित नागरिकको अवस्थाबारे समेत सरकार गम्भीर हुनुपर्ने बताए। बाढीपीडितको अवस्था र विपद्का विषयमा आफूहरूले संसदको ‘जिरो आवर’मा उठाएका विषयको सुनुवाइ नभएको उनको गुनासो थियो।
सरकारको कार्यशैलीप्रति असन्तुष्टि जनाउँदै उनले लोकतन्त्र र संविधानको रक्षा तथा जनताप्रतिको उत्तरदायित्वलाई प्राथमिकतामा राख्न सरकारलाई आग्रह गरे।
