विराटनगर । नेपाली कांग्रेसले पूर्वप्रधानन्यायाधीश चोलेन्द्रशमशेर जबरालाई प्रहरीले नियन्त्रणमा लिएको विषयमा सरकारको आधिकारिक धारणा सार्वजनिक गर्न माग गरेको छ।
सरकारी अधिकारीहरूबाटै जबरालाई नियन्त्रणमा लिएको विषयमा फरक–फरक धारणा सार्वजनिक भएको भन्दै कांग्रेसले प्रश्न उठाएको हो।
कांग्रेस प्रवक्ता देवराज चालिसेले घटनाको कानुनी आधार र औचित्य सरकारले स्पष्ट गर्नुपर्ने बताएका छन्।
कांग्रेसले जारी गरेको वक्तव्यमा सरकारी अधिकारीहरूबाटै परस्पर विरोधी धारणा आउनु गम्भीर चिन्ताको विषय भएको उल्लेख गरेको छ।
प्रहरीले भने जबरालाई आइतबार बिहान महाराजगञ्जस्थित निवासबाट नियन्त्रणमा लिएको पुष्टि गरेको छ।
तर, उनलाई पक्राउ गरिएको हो वा सुरक्षा चुनौतीका कारण सुरक्षित स्थानमा लगिएको हो भन्ने विषयमा प्रहरी अधिकारीहरूको भनाइ फरक–फरक छ।
