विराटनगर । पश्चिम नवलपरासीको सुस्ता गाउँपालिकामा नारायणी नदीको बाढी पस्दा १६५ परिवार प्रभावित भएका छन्।
सुस्ता गाउँपालिका–५ स्थित थारु टोलमा शुक्रबारदेखि बाढी पस्न थालेको थियो। बाढीका कारण थारु टोलका ७८ परिवारलाई शुक्रबार दिउँसो नै सुस्तामा निर्माण गरिएको होल्डिङ सेन्टरमा सारिएको थियो ।
त्यसपछि सैनिक टोल र बड्का टोलमा समेत बाढी पसेपछि थप ८५ परिवारलाई सुरक्षित स्थानमा सारिएको सुस्तास्थित सशस्त्र प्रहरी बेस क्याम्पका प्रहरी उपरीक्षक गोविन्दबहादुर खातीले बताए ।
नदीको पानीको सतह अझै बढिरहेकाले प्रभावित परिवारलाई नारायणी नदीको वारिपट्टि सुरक्षित स्थानमा सार्ने तयारी भइरहेको छ ।
शनिबार बिहान ७ बजेको मापनअनुसार गण्डक ब्यारेजमा नारायणी नदीको बहाव प्रतिसेकेन्ड २ लाख ६७ हजार क्युसेक पुगेको छ।
भारतीय पक्षले सुस्तामा निर्माणाधीन तटबन्धको काम रोकेपछि बाँकी रहेको १३२ मिटर क्षेत्रमा नदीले कटान गर्दै बस्ती नजिक पुगेको हो।
बाढीका कारण बस्तीका साथै उखु खेतीमा समेत क्षति पुगेको स्थानीयको भनाइ छ।
