विराटनगर । मौसम प्रतिकूल भई भारी वर्षा तथा हिमपात हुने सम्भावनालाई मध्यनजर गर्दै जिल्ला प्रशासन कार्यालय मनाङले अन्नपूर्ण पदमार्गअन्तर्गतका उच्च हिमाली क्षेत्रमा पदयात्रामा अस्थायी रोक लगाएको छ।
प्रशासनले बिहीबार सूचना जारी गर्दै शुक्रबारदेखि आइतबारसम्म तीन दिनका लागि उच्च हिमाली क्षेत्रमा पदयात्रा तथा आवागमनमा रोक लगाइएको जनाएको हो।
जल तथा मौसम विज्ञान विभागको मौसम पूर्वानुमान महाशाखाले असोज ९ देखि ११ गतेसम्म देशका विभिन्न स्थानमा भारीदेखि धेरै भारी वर्षा तथा उच्च हिमाली भेगमा हिमपातको सम्भावना रहेको पूर्वानुमान गरेपछि सम्भावित मानवीय क्षति रोक्न जिल्ला सुरक्षा समिति मनाङको बैठकले पदयात्रा स्थगन गर्ने निर्णय गरेको हो।
सहायक प्रमुख जिल्ला अधिकारी कृष्णप्रसाद पौडेलका अनुसार यो अवधिमा विश्वप्रसिद्ध तिलिचो ताल, थोरङ्ला पास, आइस लेक, काङ्ग्ला पास, भिमथाङलगायत जिल्लाका अन्य उच्च हिमाली क्षेत्रमा पदयात्रा गर्न पाइने छैन।
मौसमजन्य विपद्को उच्च जोखिम रहेकाले जोखिमयुक्त क्षेत्रमा आवागमन पूर्ण रूपमा बन्द गरिएको प्रशासनले जनाएको छ।
यसैबीच, पदयात्राका क्रममा बाटोमै रहेका स्वदेशी तथा विदेशी पर्यटकलाई तत्काल सुरक्षित स्थान वा नजिकैको होटल तथा लजमा आश्रय लिएर बस्न प्रशासनले आग्रह गरेको छ।
मौसममा सुधार नआएसम्म यात्रा अघि नबढाउन तथा सुरक्षा निकायबाट जारी निर्देशनको पूर्ण रूपमा पालना गर्न पदयात्री, पर्यटन व्यवसायी तथा सम्बन्धित सबैलाई प्रशासनले अनुरोध गरेको छ।
