काठमाडौं । नेपाली कांग्रेसले आगामी १५औँ महाधिवेशनको लोगो र नारा सार्वजनिक गरेको छ। कांग्रेसले बिहीबार सामाजिक सञ्जालमार्फत महाधिवेशनको आधिकारिक लोगो र नारा सार्वजनिक गरेको हो।
कांग्रेसले १५औँ महाधिवेशनका लागि ‘परम्पराको सम्मान, परिवर्तनको संकल्प, समुन्नत नेपालका लागि सबल कांग्रेस अबको विकल्प’ भन्ने नारा तय गरेको छ।
पार्टीको केन्द्रीय महाधिवेशन असोज १६ देखि १९ गतेसम्म काठमाडौंमा हुने कार्यतालिका छ। कांग्रेसको केन्द्रीय निर्वाचन समितिले सार्वजनिक गरेको कार्यतालिकाअनुसार महाधिवेशनअन्तर्गत विभिन्न तहका अधिवेशन प्रक्रिया अघि बढिरहेका छन्।
निर्धारित कार्यतालिकाअनुसार असोज ३ गते प्रतिनिधिसभा निर्वाचन क्षेत्रीय अधिवेशन तथा महाधिवेशन प्रतिनिधि चयन, असोज ७ गते जिल्ला अधिवेशन र असोज १० गते प्रदेश अधिवेशन गर्ने कार्यक्रम रहेको छ। त्यसपछि असोज १६ देखि १९ गतेसम्म केन्द्रीय महाधिवेशन आयोजना हुनेछ।
कांग्रेसले महाधिवेशनलाई पार्टीको संगठनात्मक गतिविधि, नेतृत्व चयन तथा आगामी राजनीतिक दिशाबारे छलफल गर्ने महत्वपूर्ण अवसरका रूपमा अघि बढाइरहेको छ। पार्टीको आधिकारिक वेबसाइटमा समेत १५औँ महाधिवेशनअन्तर्गत विभिन्न तहका अधिवेशन प्रक्रिया अघि बढिरहेको उल्लेख गरिएको छ।
महाधिवेशनका लागि सार्वजनिक गरिएको नाराले पार्टीको विगतको परम्परालाई सम्मान गर्दै परिवर्तन र समुन्नत नेपाल निर्माणको संकल्पलाई जोड दिएको छ।
यसैबीच, महाधिवेशनको मिति नजिकिँदै जाँदा कांग्रेसभित्र विभिन्न तहका अधिवेशन तथा प्रतिनिधि छनोटका गतिविधि तीव्र बनेका छन्।
