विराटनगर । नेपाललाई हिन्दु राष्ट्र घोषणा गर्नुपर्ने मागसहित राष्ट्रिय प्रजातन्त्र पार्टी (राप्रपा) मोरङले विराटनगरमा बोलबम यात्रा निकालेको छ। साउनको अन्तिम सोमबारको अवसर पारेर राप्रपा मोरङले धार्मिक तथा सामाजिक सद्भावको सन्देशसहित बोलबम यात्रा आयोजना गरेको हो।
राप्रपा मोरङले विराटनगरको सिंघिया घाटबाट जल लिएर देवकोटा चोकस्थित वनसखण्डी महादेव मन्दिरसम्म जलधारा पदयात्रा गरेको थियो। यात्रामा राप्रपाका नेता–कार्यकर्ता तथा समर्थकहरूको सहभागिता रहेको थियो।
नेपाललाई हिन्दु राष्ट्र घोषणा गर्नुपर्ने मागलाई जनस्तरसम्म पुर्याउने उद्देश्यले बोलबम यात्रा गरिएको राप्रपा मोरङका सह–सचिव सुरेश मिश्रले बताए। उनका अनुसार हिन्दु राष्ट्र नेपालको मौलिक पहिचानसँग जोडिएको विषय भएकाले यसको पुनःस्थापनाका लागि अभियान सञ्चालन गरिएको हो।
मिश्रले हिन्दु राष्ट्र नै अबको विकल्प भएको दाबी गर्दै नेपाललाई हिन्दु राष्ट्र घोषणा गर्न ढिलाइ गर्न नहुने बताए। धार्मिक आस्थासँगै राष्ट्रिय एकता र सामाजिक सद्भावलाई बलियो बनाउने उद्देश्यले यात्रा आयोजना गरिएको उनको भनाइ छ।
उनले नेपालको पहिचान र मौलिक संस्कृतिको संरक्षणका लागि राष्ट्रवादी तथा धार्मिक शक्तिहरू एक ठाउँमा उभिनुपर्नेमा जोड दिए। राप्रपाले आगामी दिनमा पनि हिन्दु राष्ट्रको मागसहितका कार्यक्रमलाई निरन्तरता दिने जनाएको छ।
