विराटनगर । राष्ट्रिय स्वतन्त्र पार्टी (रास्वपा) का सांसद् रमेश प्रसाईंले सरकारले जनताको अपेक्षाअनुसार काम गर्न नसकेको भन्दै प्रतिनिधिसभामा कडा आलोचना गरेका छन्।
शुक्रबार संसद बैठकमा बोल्दै उनले चुनावअघि सरकारी कार्यालयमा लाइन हटाएर ‘अनलाइन’ सेवा दिने प्रतिबद्धता जनतासामु गरेको स्मरण गर्दै अहिले ग्यासका लागि नागरिकहरू दिनरात लाइनमा बस्न बाध्य भएको अवस्था देख्दा आफूलाई लाज लागेको बताए।
प्रसाईंले प्रधानमन्त्री तथा मन्त्रीहरूको सरकारी निवासमा पनि ग्यास अभाव छ कि छैन भन्ने प्रश्न गर्दै सरकारले पर्याप्त ग्यास आपूर्ति भएको दाबी गर्ने हो भने कालोबजारी गर्नेहरूलाई किन कारबाही नगरिएको भन्दै प्रश्न उठाए।
उनले सरकारी कार्यालयमा अनलाइन सेवा प्रभावकारी नभएको, सर्भर बारम्बार बिग्रिने समस्याले नागरिक झन् सास्तीमा परेको उल्लेख गरे।
जनताले नयाँ सरकारसँग आकर्षक अनुहार होइन, नयाँ सोच, चरित्र र व्यवहारको अपेक्षा गरेको भन्दै उनले सरकारलाई काम गरेर विश्वास जित्न आग्रह गरे।
