विराटनगर । नेपाली कांग्रेसका सांसद् डा .चन्द्रमोहन यादवले ढल्केबरमा निर्माण हुने भनिएको ट्रमा सेन्टर अन्यत्र सार्ने सरकारी कदमको विरोधमा सदनमा मौन बसेर अनौठो शैलीमा विरोध गर्ने घोषणा गरेका छन्।
प्रतिनिधिसभाको आकस्मिक समयमा बोल्दै उनले स्वास्थ्य तथा जनसंख्यामन्त्री निशा मेहताले ढल्केबरको ट्रमा सेन्टर अन्यत्रै सार्न लागेको आरोप लगाए ।
सरकारको यो कदमको विरोधमा आफू आज दिनभर सदनमा उठेर मौन बस्ने उनले बताए ।
उनले भने‘ढल्केबरमा बन्ने भनिएको ट्रमा सेन्टर यो सरकारले सार्ने भनेको छ ।यसको विरोधमा म आज दिनभर सदनमा उठेर मौन बस्छु।’
यसअघिको सरकारले सुरुमा २० करोड रुपैयाँ र त्यसपछिको सरकारले पुनः २ करोड रुपैयाँ यसै ट्रमा सेन्टरका लागि छुट्टाइसकेको छ।
बजेट विनियोजन भई प्रक्रिया अगाडि बढिसकेको आयोजनालाई वर्तमान मन्त्रीले राजनीतिक प्रतिशोध वा अन्य स्वार्थका कारण सार्न खोजेको उनको दाबी छ।
