विराटनगर । नेपाली कांग्रेसका महामन्त्री गगन थापाको तय भएको भारत भ्रमण अन्तिम समयमा स्थगित भएको छ।
उनी शनिबार भारत जाने तयारीमा रहे पनि भ्रमण आइतबारका लागि सारिएको थियो। तर आइतबार पनि उनी भारत नजाने निर्णयमा पुगेका छन्।
भारतको नयाँदिल्लीमा नेपाली कांग्रेसको जनसम्पर्क समितिको अधिवेशन आयोजना गरिएको छ। उक्त कार्यक्रममा प्रमुख अतिथिका रूपमा सहभागी हुन थापालाई निमन्त्रणा गरिएको थियो।
कार्यक्रमका लागि आवश्यक तयारी पूरा भइसकेको भए पनि उनले अन्तिम समयमा भ्रमण स्थगित गरेका हुन्।
भारत भ्रमण स्थगित गर्नुको कारणबारे नेपाली कांग्रेसले औपचारिक रूपमा कुनै धारणा सार्वजनिक गरेको छैन।
यद्यपि पार्टी स्रोतका अनुसार पछिल्लो समय देखिएको आन्तरिक राजनीतिक विवाद नै भ्रमण स्थगित हुनुको प्रमुख कारण हुन सक्ने बताइएको छ।
विदेशस्थित जनसम्पर्क समितिको नेतृत्व चयनपछि कांग्रेसभित्र संस्थापन र इतर पक्षबीच मतभेद बढ्दै गएको छ।
