जयवीर देउवाको खातामा आएको साढे दुई करोडमाथि अनुसन्धान हुँदैछ

विराटनगर । सम्पत्ति शुद्धीकरण अनुसन्धान विभागले पूर्वप्रधानमन्त्री शेरबहादुर देउवाका छोरा जयवीर देउवा आबद्ध दुई कम्पनीमा आएको २ करोड ६० लाख रुपैयाँको कारोबारमाथि अनुसन्धान अघि बढाएको जनाएको छ।

विभागले पूर्वअर्थमन्त्री विष्णु पौडेलसहित १६ जनाविरुद्ध विशेष अदालतमा दायर गरेको सम्पत्ति शुद्धीकरण मुद्दाको आरोपपत्रमा जयवीर आबद्ध डिजी हब प्रालि र स्कलर इन्टरनेशनल प्रालिमा भएको आर्थिक कारोबार पनि अनुसन्धानको दायरामा रहेको उल्लेख गरेको छ।

आरोपपत्रअनुसार, ती दुई कम्पनीले हिमालयन एसेट्स म्यानेजमेन्ट प्रालिबाट प्राप्त गरेको २ करोड ६० लाख रुपैयाँ शंकास्पद देखिएको विभागको दाबी छ।

यसअघि विभागले गत २३ असारमा जयवीर देउवालाई सात दिनभित्र उपस्थित हुन म्याद जारी गरेको थियो।

अनुसन्धान अधिकृतहरूको टोलीले बूढानीलकण्ठस्थित देउवा निवासमा पुगेर म्यादको सूचना टाँसेको थियो।