विराटनगर । कोशी प्रदेश सरकारबाट पनि नेपाली कांग्रेस बाहिरिने भएको छ।
सुदूरपश्चिम प्रदेशमा एमालेसँगको सहकार्यमा देखिएको असहजतापछि कांग्रेसले सातै प्रदेश सरकारबाट आफ्ना मन्त्रीहरू फिर्ता बोलाउने निर्णय गरेसँगै कोशीमा पनि कांग्रेस अलग्गिन लागेको हो।कोशीका चार मन्त्रीले आजै राजीनामा दिने तयारी गरेका छन्।
कांग्रेसका मन्त्रीहरू भौतिक पूर्वाधार, स्वास्थ्य, उद्योग–कृषि तथा सहकारी र पर्यटन, वन तथा वातावरण मन्त्रालयको जिम्मेवारीमा थिए।
राजीनामाबारे औपचारिक निर्णय गर्न कांग्रेस संसदीय दलको बैठक बसिरहेको छ। कांग्रेस सरकारबाट बाहिरिएसँगै हिक्मत कार्की नेतृत्वको कोशी सरकारको राजनीतिक समीकरण फेरिने भएको छ।
