मिडिया हाउसअघि शंकास्पद गाडी राखिएको घटनाप्रति रास्वपाको आपत्ति, निष्पक्ष छानबिन र कारबाहीको माग

काठमाडौं । विभिन्न सञ्चारमाध्यमका कार्यालय बाहिर शंकास्पद रूपमा सवारी साधन राखिएको घटनाप्रति राष्ट्रिय स्वतन्त्र पार्टी (रास्वपा) ले गम्भीर ध्यानाकर्षण भएको जनाएको छ। पार्टीले उक्त घटनालाई प्रेस स्वतन्त्रतामाथिको मनोवैज्ञानिक दबाब सिर्जना गर्ने प्रयासको संज्ञा दिँदै तत्काल निष्पक्ष छानबिन र दोषीमाथि कानुनी कारबाही गर्न सरकारसँग माग गरेको छ।

पार्टीका महामन्त्री विपिनकुमार आचार्यद्वारा सोमबार जारी विज्ञप्तिमा राज्यको चौथो अङ्गका रूपमा स्थापित आमसञ्चार माध्यम र सञ्चारकर्मीहरूलाई त्रसित बनाउने उद्देश्यले गरिएका यस्ता गतिविधि लोकतान्त्रिक मूल्य–मान्यताको ठाडो उल्लङ्घन भएको उल्लेख गरिएको छ।

“राज्यको चौथो अङ्गका रूपमा रहेका सञ्चारकर्मीहरूले निर्भीक रूपमा कार्य गर्ने वातावरणमा धावा बोल्ने वा उनीहरूलाई मनोवैज्ञानिक दबाबमा राख्ने आशयले गरिएका यस्ता शंकास्पद र रहस्यमय गतिविधि लोकतान्त्रिक मूल्य–मान्यताको ठाडो उल्लङ्घन हुन्,” विज्ञप्तिमा भनिएको छ।

रास्वपाले आफू लोकतान्त्रिक, जिम्मेवार र विधिको शासनमा विश्वास गर्ने राजनीतिक दल भएको उल्लेख गर्दै पूर्ण प्रेस स्वतन्त्रता, नागरिकको सुसूचित हुन पाउने मौलिक अधिकार र स्वतन्त्र पत्रकारिताको पक्षमा सधैँ दृढतापूर्वक उभिने स्पष्ट पारेको छ। कुनै पनि बहानामा सूचना तथा सञ्चार स्वतन्त्रता हनन गर्ने तथा सञ्चारगृहमा त्रासको वातावरण सिर्जना गर्ने गतिविधि स्वीकार्य नहुने पार्टीको भनाइ छ।

विज्ञप्तिमा स्वतन्त्र र भयमुक्त पत्रकारितालाई लोकतन्त्रको प्राणवायुका रूपमा व्याख्या गर्दै सञ्चार क्षेत्रलाई त्रसित बनाउने उद्देश्यले गरिएका यस्ता गतिविधिको भर्त्सना गरिएको छ। साथै, घटनाको तत्काल, निष्पक्ष र सत्यतथ्य छानबिन गरी सञ्चारमाध्यमको भौतिक तथा मनोवैज्ञानिक सुरक्षा सुनिश्चित गर्न नेपाल सरकार, गृह मन्त्रालय र सम्बन्धित सुरक्षा निकायको ध्यानाकर्षण गराइएको छ।

रास्वपाले शंकास्पद गतिविधिमा संलग्न जोकोहीलाई तत्काल पहिचान गरी कानुनबमोजिम कारबाही गर्न माग गरेको छ। साथै, सम्पूर्ण सञ्चारकर्मीलाई कुनै पनि दबाब वा त्रासमा नपरी सत्यतथ्यमा आधारित पत्रकारिताको व्यावसायिक धर्म निर्वाह गर्न आग्रह गर्दै पार्टी सधैँ प्रेस स्वतन्त्रता र सञ्चारगृहहरूको सुरक्षाको पक्षमा रहने प्रतिबद्धता व्यक्त गरेको छ।

सोमबार काठमाडौंको तीनकुनेस्थित कान्तिपुर मिडिया हाउस, मध्यबानेश्वरस्थित हिमालयन टेलिभिजन, नयाँ बानेश्वरस्थित अनलाइनखबरलगायत सञ्चारमाध्यमका कार्यालयअगाडि शंकास्पद रूपमा सवारी साधन पार्किङ गरी छाडिएको थियो। पछि नेपाल प्रहरीले ती सवारी साधन क्रेनको सहायताले हटाएको थियो।