विराटनगर- विराटनगरमा चिठ्ठामार्फत आकर्षक उपहारको प्रलोभन देखाएर ठगी भइरहेको पाइएको छ। प्रहरीले विराटनगर महानगरपालिका-११ महेन्द्र चोक बस्ने ३५ वर्षीय सुवास राईलाई पक्राउ गरेपछि चिठ्ठामार्फत भइरहेको ठगीको रहस्य खुलेको हो।
जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार श्रेष्ठका अनुसार राईले महेन्द्र चोकमा ओसियन डिजिटल सोलुसन प्रालि नामक अनधिकृत कम्पनी खडा गरी यस्तो धन्दा चलाउँदै आएका थिए। उनले विभिन्न आकर्षक इलेक्ट्रोनिक सामान चिठ्ठामा पर्ने भन्दै रसिद काटेर रकम उठाउने गरेका थिए।
यसबारे सूचना पाएपछि शुक्रबार दिउँसो २ बजे जिल्ला प्रहरी कार्यालय मोरङ र वडा प्रहरी कार्यालय विराटनगरबाट खटिएको प्रहरी टोलीले चेकजाँच गरेको थियो। राईलाई चिठ्ठा खेलाइरहेकै अवस्थामा उनीद्वारा सञ्चालित कम्पनीका विभिन्न कागजात र रसिदसहित प्रहरीले पक्राउ गरेको हो।
पक्राउ परेका राईमाथि चिठ्ठा ऐन, २०२५ अन्तर्गत चिठ्ठासम्बन्धी कसुरमा मोरङ जिल्ला अदालतबाट म्याद लिएर थप अनुसन्धान भइरहेको प्रहरीले जनाएको छ।
