चितवन । राष्ट्रिय स्वतन्त्र पार्टी (रास्वपा) को महाधिवेशन स्थलमा दुग्ध विकास संस्थान (डीडीसी) का विभिन्न दुग्धजन्य उत्पादनहरू बिक्रीका लागि राखिएका छन्। महाधिवेशनस्थलमा स्थापना गरिएको बिक्री कक्षमा डीडीसीका करिब २० प्रकारका उत्पादन उपलब्ध रहेको र तिनमा ५ देखि १० प्रतिशतसम्म छुट दिइएको डीडीसीका बिजनेस डेभलपमेन्ट अफिसर चिरन्जीवी बस्नेतले जानकारी दिएका छन्।
डीडीसीका अनुसार महाधिवेशनमा सहभागी प्रतिनिधि, आगन्तुक तथा सर्वसाधारणलाई लक्षित गर्दै विशेष बिक्री केन्द्र सञ्चालन गरिएको हो। बिक्री कक्षमा दूध, दही, घ्यु, मही, पनिर, चिज, आइसक्रिम, दूध पाउडर, खुवा लगायतका विभिन्न उत्पादन राखिएका छन्।
यसअघि रास्वपाका वरिष्ठ नेता तथा प्रधानमन्त्री बालेन शाहले डीडीसीका उत्पादन, विशेषगरी चिजसहितको तस्बिर सामाजिक सञ्जालमा सार्वजनिक गरेपछि ती उत्पादनहरू व्यापक चर्चामा आएका थिए। त्यसको केही दिनपछि मन्त्रिपरिषद् बैठकमा समेत डीडीसीका उत्पादनहरू प्रयोग गरिएको तस्बिर सार्वजनिक भएको थियो।
कम्पनी ऐनअन्तर्गत २०२१ सालमा स्थापना भएको डीडीसी नेपाल सरकारको पूर्ण स्वामित्वमा रहेको संस्था हो। यसले देशभरका किसानबाट दूध खरिद गरी विभिन्न दुग्धजन्य उत्पादन उत्पादन तथा बिक्री वितरण गर्दै आएको छ। रास्वपाको महाधिवेशनमा डीडीसीको उपस्थिति स्थानीय उत्पादनको प्रवर्द्धन र सरकारी स्वामित्वका उत्पादनको बजार विस्तारसँग जोडिएको रूपमा हेरिएको छ।
