विराटनगर । कोशी प्रदेशका आन्तरिक मामिला तथा कानुनमन्त्री इन्द्रमणि पराजुलीको विराटनगरस्थित सरकारी निवासमा बिहीबार राति प्रहरी पुगेपछि घटना सार्वजनिक रूपमा चासोको विषय बनेको छ।
आज बसेको संसद बैठकमा धनकुटाबाट निर्वाचित एमाले सांसद् राजेन्द्र राईले पनि यो विषयमा कुरा उठाएका थिए ।
विराटनगर–३ स्थित मन्त्री पराजुलीको निवासमा करिब राति ११ बजे प्रहरी टोली पुगेको थियो। त्यसबेला मन्त्री भने निवासमा थिएनन्। उनी आफू सो समयमा संखुवासभामा रहेको बताएका छन्।
प्रहरीले भने मन्त्री निवासमा छापा मारिएको भन्ने दाबी अस्वीकार गर्दै, एक व्यक्तिको खोजीका क्रममा मात्र टोली त्यस क्षेत्रसम्म पुगेको स्पष्ट पारेको छ।
मोरङ प्रहरी प्रमुख एसपी कवित कटुवालका अनुसार एक व्यक्ति त्यहाँ लुकेको भन्ने सूचनाका आधारमा अनुसन्धान अघि बढाइएको हो।
अपराधमा संलग्न भनिएका विमल भट्टराई सो घरमा पहिले बस्दै आएको सूचना समेत प्राप्त भएको प्रहरी स्रोतले जनाएको छ।
