विराटनगर । अपराध अनुसन्धानलाई थप प्रभावकारी, तथ्यमा आधारित तथा प्रविधिमैत्री बनाउने उद्देश्यले कोशी प्रदेश प्रहरी कार्यालय, विराटनगरले एक दिवसीय अपराध अनुसन्धान गोष्ठी आयोजना गरेको छ। गोष्ठीमा कोशी प्रदेशका १४ वटै जिल्लाका जिल्ला प्रहरी कार्यालयका अपराध अनुसन्धान शाखामा कार्यरत प्रहरी अधिकृत तथा अनुसन्धानमा संलग्न प्रहरी कर्मचारीहरूको सहभागिता रहेको थियो।
गोष्ठीको उद्घाटन कोशी प्रदेशका मुख्यमन्त्री हिक्मत कुमार कार्कीले गर्नुभएको थियो। कार्यक्रममा प्रदेशभर भइरहेका अपराध अनुसन्धानका गतिविधि, अनुसन्धानका क्रममा देखिएका चुनौती तथा समाधानका उपायबारे विस्तृत छलफल गरिएको थियो।
कार्यक्रममा सहभागी प्रहरी अधिकारीहरूले अनुसन्धान प्रक्रियामा आधुनिक प्रविधिको प्रयोग, वैज्ञानिक प्रमाण संकलन, अन्तरजिल्ला समन्वय तथा अनुसन्धानलाई अझ प्रभावकारी बनाउने उपायबारे अनुभव आदानप्रदान गरेका थिए। साथै जटिल प्रकृतिका अपराधहरूको अनुसन्धानमा अपनाइने नयाँ अभ्यास र कार्यविधिबारे समेत चर्चा गरिएको थियो।
प्रमुख अतिथि मुख्यमन्त्री कार्कीले शान्ति सुरक्षा कायम गर्न र अपराध नियन्त्रणमा अनुसन्धानको भूमिका अत्यन्त महत्वपूर्ण रहेको बताउनुभयो। उहाँले अपराध अनुसन्धानलाई तथ्य, प्रमाण र आधुनिक प्रविधिमा आधारित बनाउँदै लैजानुपर्ने आवश्यकता औँल्याउनुभयो। अपराध नियन्त्रण र न्याय सम्पादनका लागि अनुसन्धानको गुणस्तर सुधार अपरिहार्य रहेको उल्लेख गर्दै उहाँले प्रहरी संगठनलाई थप व्यावसायिक र प्रविधिमैत्री बनाउन प्रदेश सरकार सकारात्मक रहेको बताउनुभयो।
कोशी प्रदेश प्रहरी कार्यालयले आयोजना गरेको उक्त गोष्ठीले अनुसन्धानमा संलग्न प्रहरी कर्मचारीहरूको क्षमता अभिवृद्धि गर्नुका साथै प्रदेशभर अपराध अनुसन्धान कार्यलाई थप प्रभावकारी, समन्वयात्मक र नतिजामुखी बनाउन महत्वपूर्ण योगदान पुग्ने विश्वास व्यक्त गरिएको छ।
कार्यक्रममा प्रदेश प्रहरीका उच्च अधिकृत, अनुसन्धान शाखाका प्रमुख तथा विभिन्न जिल्लाबाट आएका प्रहरी कर्मचारीहरूको उल्लेखनीय सहभागिता रहेको थियो।
