विराटनगर। आर्थिक विधेयकमा कर दर हेरफेर र दस्तावेज परिवर्तन तथा सूचना चुहावटको आरोपसहितको विवाद चुलिँदै जाँदा राप्रपाका संसदीय दलका नेता ज्ञानेन्द्र शाहीले अर्थमन्त्री स्वर्णिम वाग्ले माथि संसदीय छानबिन समिति गठन गर्न कडा माग गरेका छन्।
शाहीले बजेट निर्माण प्रक्रियामा गम्भीर अनियमितताको आशंका व्यक्त गर्दै निष्पक्ष छानबिनमार्फत सत्य तथ्य बाहिर ल्याउनुपर्ने बताएका छन्।
उनले कुनै गल्ती नभए छानबिनबाट किन हिचकिचाउने भन्दै प्रश्न गर्दै, दोषी देखिए कानुनी दायरामा ल्याउन संसदलाई पूर्ण सहयोग गर्ने बताएका छन्।
यता अर्थमन्त्री वाग्लेले भने संसदीय छानबिन समिति गठनको मागलाई अस्वीकार गर्दै विपक्षी दलहरूलाई संयमित हुन आग्रह गरेका छन्।
प्रतिनिधिसभा अन्तर्गतको अर्थ समितिको बैठकमा उनले जथाभावी छानबिन समिति गठन गर्नु उपयुक्त नभएको टिप्पणी गर्दै संसद त्यति सस्तो होइन भन्ने धारणा राखेका छन्।
विपक्षी दलहरूले भने कर दर हेरफेर, सूचना चुहावट र राजस्व नोक्सानीको आशंकामा संसदीय छानबिन समिति गठन तथा अर्थमन्त्रीको राजीनामा समेत माग गरिरहेका छन्।
