काठमाडौं । प्रमुख प्रतिपक्षी दल नेकपा एमालेले गृहमन्त्रीमा पुनः सुदन गुरुङ लाई नियुक्त गर्नु सुशासनको भद्दा मजाक भएको टिप्पणी गरेको छ।
मंगलबार सिंहदरबारमा बसेको विपक्षी दलहरूको बैठकपछि सञ्चारकर्मीसँग कुरा गर्दै एमाले प्रमुख सचेतक ऐनबहादुर महरले सरकारले सुशासनको नारा दिए पनि व्यवहारमा पुरानै र जनस्तरबाट अस्वीकृत शैली अपनाइरहेको आरोप लगाए।
उनले गृहमन्त्रीसँग सम्बन्धित सम्पत्ति विवरणबारे उठेका प्रश्नहरूको निष्पक्ष छानबिन गर्नुपर्नेमा सरकारले आफ्नै मातहतमा आयोग गठन गरेर आरोपितहरूलाई चोख्याउने प्रयास गरेको दाबी गरे।
“सरकारले सुशासनको कुरा गर्छ, तर ज्वलन्त प्रश्न उठेपछि आफैँ आयोग बनाउने, आफैँ म्यान्डेट दिने र त्यसैबाट आफूलाई सफाइ दिने प्रयास गरिरहेको छ,” महरले भने, “यो सुशासनको नमुना होइन, सुशासनको भद्दा मजाक हो।”
महरले सरकारको पछिल्लो कार्यशैली विडम्बनापूर्ण, दुःखद र अचम्मलाग्दो भएको टिप्पणी गर्दै निष्पक्ष छानबिनका लागि संसदीय संयन्त्रमार्फत अनुसन्धान हुनुपर्ने बताए।
उनले विशेषगरी अर्थ मन्त्रालयसँग सम्बन्धित पछिल्ला विवादमा गम्भीर प्रश्न उठाउँदै बिवाइडी गाडी आयातमा भएको भनिएको कर छली तथा आर्थिक विधेयकमा करका दर हेरफेर गरिएको विषयलाई ‘नीतिगत भ्रष्टाचार’ र ‘राज्यविरुद्धको अपराध’को संज्ञा दिए।
विपक्षी दलहरूले सरकारले गठन गरेका छानबिन संयन्त्रबाट निष्पक्ष नतिजा आउनेमा विश्वास गर्न नसकिने भन्दै संसद्को मातहतमा उच्चस्तरीय छानबिन समिति गठन गर्नुपर्ने माग दोहोर्याएका छन्।
