विराटनगर ।परराष्ट्रमन्त्री शिशिर खनालले नेपाल र भारतबीच रहेका सीमा विवादहरू द्विपक्षीय संवाद र कूटनीतिक माध्यमबाटै समाधान गर्नुपर्ने बताएका छन्।
भारत भ्रमणका क्रममा नयाँ दिल्लीस्थित नेपाली दूतावासमा आयोजित पत्रकार सम्मेलनमा उनले लिपुलेक–लिम्पियाधुरा क्षेत्र नेपालको भूमि भएकाले नेपालबिना भारत र चीनले त्यससम्बन्धी कुनै पनि सहमति गर्न नसक्ने स्पष्ट पारे।
भारत र चीनबीच लिपुलेक मार्ग हुँदै कैलाश मानसरोवर यात्रासम्बन्धी भएको सहमतिबारे उठेको प्रश्नमा उनले नेपालको सहमतिबिना नेपाली भूभागसँग सम्बन्धित कुनै पनि सम्झौता स्वीकार्य नहुने बताए।
उनले नेपालले विगत केही वर्षदेखि आफ्नो भूमि सम्बन्धी दाबीबारे भारत र चीन दुवैलाई कूटनीतिक नोटमार्फत जानकारी गराउँदै आएको उल्लेख गर्दै लिपुलेक–लिम्पियाधुरा नेपालको ऐतिहासिक भूभाग भएको बताए।
