काठमाडौं । राष्ट्रिय स्वतन्त्र पार्टीका सभापति रवि लामिछानेले भारत भ्रमणका क्रममा भारतका विदेशमन्त्री डा. एस जयशंकरसँग भेटवार्ता गरेका छन्।
भेटवार्तामा विक्रम मिस्रीको समेत उपस्थिति रहेको थियो। दुई देशबीचको सम्बन्ध, समसामयिक राजनीतिक विषय तथा आपसी हितका विविध मुद्दामा छलफल भएको बताइएको छ।
सभापति लामिछाने भारतीय जनता पार्टी (भाजपा)को निमन्त्रणामा हिजो भारत भ्रमणमा गएका हुन्। भ्रमणका क्रममा उनलाई भाजपाले औपचारिक तथा भव्य स्वागत गरेको जनाएको छ।
भारत पुगेलगत्तै लामिछानेले उच्चस्तरीय राजनीतिक भेटघाटलाई तीव्रता दिएका छन्। उनले आजबाट विभिन्न भारतीय राजनीतिक नेतृत्व तथा सरोकारवाला पक्षसँग भेटवार्ता सुरु गरेका हुन्।
रास्वपाका सभापति लामिछानेको यो भ्रमणलाई नेपाल–भारत सम्बन्ध, राजनीतिक संवाद र आपसी सहकार्यका दृष्टिले महत्त्वपूर्ण रूपमा हेरिएको छ। भ्रमणका क्रममा उनले थप राजनीतिक तथा कूटनीतिक भेटघाट गर्ने कार्यक्रम रहेको बताइएको छ।
