मन्त्रिपरिषद्का चार निर्णय सार्वजनिक

सरकारका प्रवक्ता तथा शिक्षामन्त्री सस्मित पोखरेलले बैठकका निर्णय सार्वजनिक गर्दै गृह मन्त्रालयको प्रस्तावमा अञ्जनी कुमार पोखरेललाई सशस्त्र प्रहरी अतिरिक्त महानिरीक्षक (एआईजी) पदमा बढुवा गर्ने निर्णय भएको जानकारी दिए।

मन्त्रिपरिषद्का निर्णयहरू यस प्रकार छन्–

• संयुक्त राष्ट्रसङ्घीय वातावरण कार्यक्रम (यूएनईपी) अन्तर्गत ओजोन तहलाई हानी पुर्‍याउने पदार्थको व्यवस्थापन तथा न्यूनीकरणसम्बन्धी मोन्ट्रियल प्रोटोकल कार्यान्वयनसम्बन्धी सम्झौता स्वीकृत गर्ने।
• सशस्त्र प्रहरी नायब महानिरीक्षक अञ्जनी कुमार पोखरेललाई सशस्त्र प्रहरी बल नेपालको अतिरिक्त महानिरीक्षक (एआईजी) पदमा बढुवा गर्ने।
• २०८२ साल भदौ २३ र २४ गतेको प्रदर्शनका क्रममा भएको घटनाको छानबिन आयोगको प्रतिवेदनमा उल्लेखित सुरक्षा संयन्त्रबारे अध्ययन तथा सिफारिस गर्न गठित अध्ययन समितिको कार्यावधि ४५ दिन थप गर्ने।
• भूमि समस्या समाधान समितिको अध्यक्षमा बलभद्र बास्कोटालाई नियुक्त गर्ने तथा सदस्यहरूमा अमिर प्रसाद न्यौपाने, पद्मनिधि सोती र डा. रोहना श्रेष्ठलाई नियुक्त गर्ने।

सरकारले यी निर्णयहरू मंगलबार बसेको मन्त्रिपरिषद् बैठकबाट गरेको हो।