काठमाडौं । संघीय संसद अन्तर्गत प्रतिनिधिसभाको बैठक आज बस्दैछ। दिउँसो १ बजे सिंहदरबारस्थित संसद भवनमा बस्ने बैठकमा आगामी आर्थिक वर्ष २०८३/०८४ को बजेटमाथि औपचारिक छलफल प्रारम्भ हुने भएको छ।
बैठकको प्रारम्भमा सभामुख डीपी अर्यालले राष्ट्रपति कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा सदनलाई जानकारी गराउने कार्यसूची रहेको छ।
त्यसपछि सरकारले हालै सार्वजनिक गरेको आगामी आर्थिक वर्षको राजस्व र व्ययको वार्षिक अनुमान अर्थात् बजेटमाथि सामान्य छलफल सुरु हुनेछ। संसद सचिवालयले सार्वजनिक गरेको कार्यसूचीअनुसार अर्थमन्त्री डा. स्वर्णिम वाग्लेले बजेटमाथिको सामान्य छलफल प्रारम्भ गरियोस् भन्ने प्रस्ताव सदनमा पेश गर्नेछन्।
सरकारले सार्वजनिक गरेको बजेटमाथि सत्ता पक्ष र विपक्षी दलका सांसदहरूले आफ्ना धारणा राख्ने तयारी गरेका छन्। बजेटका प्राथमिकता, राजस्व संकलन, विकास खर्च, सामाजिक सुरक्षा, पूर्वाधार निर्माण तथा आर्थिक सुधारका विषयमा संसदमा व्यापक बहस हुने अपेक्षा गरिएको छ।
बजेट सार्वजनिक भएसँगै विभिन्न राजनीतिक दल, निजी क्षेत्र तथा सरोकारवाला निकायबाट समर्थन र आलोचना दुवै आएको छ। त्यसैले आजबाट सुरु हुने संसदीय छलफललाई अर्थपूर्ण रूपमा हेरिएको छ।
प्रतिनिधिसभाको बैठकमा बजेटमाथिको प्रारम्भिक छलफलपछि मन्त्रालयगत शीर्षकहरूमा समेत क्रमशः विस्तृत बहस हुने संसदीय कार्यतालिका रहेको छ। आगामी आर्थिक वर्षका लागि सरकारले अघि सारेका योजना, कार्यक्रम र खर्चका प्राथमिकताबारे सांसदहरूले सरकारसँग जवाफ माग्ने र सुझाव दिने अपेक्षा गरिएको छ।
