काठमाडौं । सामाजिक सञ्जाल टिकटकमार्फत चर्चामा आएकी तुलसा अधिकारी (तुलसी अधिकारी) पक्राउ परेकी छन्। उनीविरुद्ध जारी गरिएको इन्टरपोलको रेड कर्नर नोटिसका आधारमा थाइल्यान्डमा पक्राउ परेकी हुन्।
प्रहरीका अनुसार पक्राउपछि उनलाई नेपाल ल्याइएको छ र हाल जिल्ला प्रहरी परिसर ललितपुर को हिरासतमा राखिएको छ। जिल्ला प्रहरी परिसर ललितपुरका एसपी गौतम मिश्र ले तुलसा अधिकारीलाई हिरासतमा राखिएको पुष्टि गरेका छन्।
प्रहरीका अनुसार पछिल्लो समय अधिकारी चाइनामा बस्दै आएकी थिइन्। त्यहाँबाट उनी थाइल्यान्ड पुगेपछि इन्टरपोलको समन्वयमा पक्राउ गरिएको हो।
उनीविरुद्ध यसअघि नै मुद्दा दर्ता भइसकेको प्रहरीले जनाएको छ। पक्राउपछि आवश्यक कानुनी प्रक्रिया अघि बढाउन सोमबार जिल्ला अदालत ललितपुरमा उपस्थित गराउने तयारी गरिएको छ।
यसअघि सातदोबाटोस्थित अटोमोबाइल व्यवसायी कुमार चिमोरियाले अधिकारीविरुद्ध प्रहरीमा जाहेरी दिएका थिए। त्यसपछि उनी सम्पर्कविहीन बनेकी थिइन् र फरार सूचीमा रहेकी थिइन्। प्रहरीको अनुरोधमा इन्टरपोलमार्फत रेड कर्नर नोटिस जारी भएपछि उनको खोजी अन्तर्राष्ट्रिय स्तरमा भइरहेको थियो।
थाइल्यान्डबाट पक्राउ परेपछि अब उनीमाथि दर्ता भएका मुद्दाको कानुनी प्रक्रिया नेपालमै अघि बढ्ने प्रहरीले जनाएको छ।
