विराटनगर । प्रतिनिधिसभाको आजको बैठकमा सत्ता पक्ष र विपक्षीबीच विवाद हुँदा संसदमा तनावपूर्ण अवस्था सिर्जना भएको छ।
पर्यटन विधेयक २०८२ माथिको सैद्धान्तिक छलफल चलिरहेकै बेला राष्ट्रिय स्वतन्त्र पार्टीका सांसद् जगदीश खरेलले रोष्ट्रमबाट विपक्षी दलप्रति कडा टिप्पणी गरेपछि सदनको माहोल तातिएको हो।
विपक्षी दलहरूले प्रधानमन्त्री सदनमा उपस्थित भएर जवाफ दिनुपर्ने माग राख्दै लगातार नाराबाजी गरिरहेका थिए। यही क्रममा बोल्न उभिएका खरेलले विपक्षी दलमाथि गम्भीर आरोप लगाउँदै आलोचना गरेपछि नेपाली कांग्रेसका सांसद नरेन्द्र कुमार केरुङ आक्रामक रूपमा प्रस्तुत भएका थिए।
खरेलको अभिव्यक्तिप्रति असन्तुष्टि जनाउँदै केरुङले औँला ठड्याउँदै प्रतिवाद गर्न खोजेका थिए भने पाखुरा समेत सुर्किन थालेपछि संसदमा केहीबेर तनावपूर्ण दृश्य देखिएको थियो।
त्यसपछि कांग्रेस प्रमुख सचेतक बासना थापाले हस्तक्षेप गर्दै केरुङलाई सम्हालेकी थिइन्।
