विराटनगर । राष्ट्रिय विपद् जोखिम न्यूनीकरण तथा व्यवस्थापन प्राधिकरणले यस वर्षको मनसुनजन्य विपद् प्रतिकार्यका लागि २६ हजार सुरक्षाकर्मी परिचालन गर्ने योजना सार्वजनिक गरेको छ।
कार्यकारी समितिको ३४औँ बैठकबाट स्वीकृत ‘मनसुन पूर्वतयारी तथा प्रतिकार्य राष्ट्रिय कार्ययोजना–२०८३’ अनुसार सेना, नेपाल प्रहरी र सशस्त्र प्रहरीका सुरक्षाकर्मीलाई विपद् उद्धार तथा राहत कार्यमा परिचालन गरिने भएको हो।
वैशाख ३१ गते पूर्वाधार विकास मन्त्री सुनिल लम्सालको नेतृत्वमा बसेको कार्यकारी समितिको बैठकले उक्त कार्ययोजना स्वीकृत गरेको थियो।
विगतका विपद्का तथ्यांकको विश्लेषण गर्दै यस वर्ष मनसुनबाट हुन सक्ने जोखिमको पूर्वानुमान गरी विभिन्न मन्त्रालय र सुरक्षा निकायको जिम्मेवारी निर्धारण गरिएको छ।
कार्ययोजनामा यस वर्ष मनसुनजन्य विपद्बाट करिब ५१ हजार घरधुरी प्रभावित हुन सक्ने अनुमान गरिएको छ।
विपद् व्यवस्थापनका लागि जिल्ला, प्रदेश र केन्द्र तहको कोषमा गरी ७ अर्ब ५६ करोड रुपैयाँ मौज्दात रहेको प्राधिकरणले जनाएको छ।
उक्त रकम प्राधिकरणको समन्वयमा उद्धार, राहत तथा विपद् प्रतिकार्यमा खर्च गरिनेछ।
