विराटनगर । राष्ट्रिय स्वतन्त्र पार्टीकी सांसद् अनुष्का श्रेष्ठले त्रिभुवन अन्तर्राष्ट्रिय विमानस्थलका सबै पसलहरूमा अनिवार्य रूपमा नेपाली वस्तुहरूको बिक्री वितरण हुने गरी आवश्यक व्यवस्था मिलाउन सरकारसँग माग गरेकी छन्।
प्रतिनिधिसभा बैठकको शून्य समयमा बोल्दै उनले विमानस्थलबाट दैनिक हजारौँ यात्रु विदेशिने भएकाले नेपाली स्वाद र पहिचानलाई विश्वभर फैलाउन सरकारले नेपाली उद्यमीहरूले उत्पादन गरेका वस्तुहरूलाई त्यहाँ प्राथमिकतासाथ बिक्रीका लागि राख्नुपर्ने बताइन् ।
उनले भनिन्,‘हाम्रो त्रिभुवन विमानस्थलमा नेपाल चिनाउने स्वाद, हस्तकला र मेड इन नेपालको उपस्थिति अझै कमजोर देखिन्छ। दैनिक हजारौँ यात्रु नेपालबाट प्रस्थान गरिरहँदा स्थानीय उत्पादनमा स्वाद बोकेर पठाउन सक्नु नेपालको पहिचान विश्वसामु पुर्याउने एक अवसर हो। म सरकार र टिआइए व्यवस्थापनलाई आग्रह गर्न चाहन्छु, विमानस्थलका सबै पसल तथा टेन्डर प्रक्रियामा अनिवार्य रूपमा नेपाली उत्पादनका डेडिकेटेड सेक्सन व्यवस्था गरियोस्।’
