विराटनगर । काठमाडौं महानगरपालिकाले गोरखा मिडिया नेटवर्क प्रालिद्वारा सञ्चालित ग्यालेक्सी फोरके टेलिभिजनलाई कार्यालयमा रहेका सम्पूर्ण सामान १५ दिनभित्र हटाउन अन्तिम सूचना जारी गरेको छ।
महानगरपालिका वडा नं. ३ का मृगेन्द्रप्रसाद मिश्र र गोरखा मिडिया नेटवर्कका अध्यक्ष जीतेन्द्रबाबु राईबीच चलेको भाडा असुल उपर गरी घरजग्गा खाली गराइपाऊँ मुद्दामा महानगरको न्यायिक समितिले २०८१ कात्तिक १४ गते घरधनीको पक्षमा फैसला गरेको थियो।
फैसलाअनुसार गोरखा मिडिया नेटवर्कबाट बाँकी घरबहाल रकम तथा बहाल कर असुल गरी घरजग्गा खाली गराउन आदेश दिइएको थियो। तर निर्णय कार्यान्वयन नभएपछि उच्च अदालत पाटनले २०८२ साउन २८ गते दुई महिनाभित्र फैसला कार्यान्वयन गर्न महानगरपालिकाका नाममा परमादेश जारी गरेको थियो।
अदालतको आदेशपछि २०८२ कात्तिक १४ गते महानगरपालिकाको टोलीले घरजग्गा खाली गराउने प्रक्रिया अघि बढाएको थियो। तर फैसला कार्यान्वयन भएको ६ महिनाभन्दा बढी समय बितिसक्दा पनि कार्यालयका सामान नहटाइएपछि घरधनी मिश्रले २०८३ वैशाख २१ गते ती सामान लिलाम गरिपाऊँ भन्दै महानगरमा निवेदन दिएका थिए।
उक्त निवेदनका आधारमा महानगरपालिकाले १५ दिने म्याद दिँदै अन्तिम अवसर प्रदान गरेको हो। तोकिएको अवधिभित्र बाँकी बहाल रकम नबुझाई सामान नलगिए महानगरको न्यायिक समितिको कार्यविधिअनुसार सामान लिलाम गरिने चेतावनीसमेत दिइएको छ।
ग्यालेक्सी फोरके टेलिभिजन राष्ट्रिय स्वतन्त्र पार्टीका सभापति रवि लामिछानेको नेतृत्व तथा जीबी राईलगायतको लगानीमा सञ्चालनमा आएको थियो। लामिछाने राजनीतिमा प्रवेश गरेपछि उक्त टेलिभिजन प्रसारण बन्द भएको थियो।
