नेपाली कांग्रेसको सदस्यता व्यवस्थापन केन्द्रीय समितिले सुदूरपश्चिम प्रदेशमा क्रियाशील सदस्यता अद्यावधिकसम्बन्धी अन्तर्क्रियात्मक कार्यक्रम आयोजना गर्ने भएको छ। महामन्त्री प्रदीप पौडेल संयोजक रहेको समितिले जेठ ११ गते कञ्चनपुरको महेन्द्रनगरमा कार्यक्रम गर्न लागेको हो।
कार्यवाहक मुख्य सचिव कृष्णप्रसाद दुलाल का अनुसार कार्यक्रममा सुदूरपश्चिम प्रदेशका केन्द्रीय सदस्य, जिल्ला सभापति, क्षेत्रीय सभापति, जरा अभियानका प्रतिनिधि तथा प्रविधि विज्ञहरू सहभागी हुनेछन्।
महामन्त्री पौडेलले कांग्रेसलाई पूर्ण डिजिटल सदस्यता प्रणालीमा रूपान्तरण गर्ने उद्देश्यले प्रदेशस्तरीय प्रशिक्षण र भेला सञ्चालन भइरहेको बताएका छन्। उनका अनुसार कोशी, कर्णाली, लुम्बिनी र बागमती प्रदेशमा यस्ता कार्यक्रम सम्पन्न भइसकेका छन्।
कांग्रेसले जेठ २१ गतेभित्र नयाँ क्रियाशील सदस्य वितरण, पुराना सदस्य नवीकरण र सम्पूर्ण सदस्यता अद्यावधिक गरिसक्न निर्देशन दिएको छ। अद्यावधिक नगर्ने वडा सभापतिमाथि जिम्मेवारी खोस्ने तयारीसमेत पार्टीले गरेको जनाएको छ।
यद्यपि, पूर्णबहादुर खड्का र शेखर कोइराला पक्षले यसअघि नै लाखौं सदस्यता वितरण भइसकेकाले पुनः अद्यावधिक आवश्यक नरहेको भन्दै प्रश्न उठाएका छन्।
कांग्रेसले असोजमा हुने १५औं महाधिवेशनलाई लक्षित गर्दै सदस्यता व्यवस्थापन र डिजिटल डाटाबेस निर्माण अभियानलाई तीव्र बनाएको छ।
