विराटनगर । दुहबी नगरपालिकाको लघुउद्यम विकास शाखाले सञ्चालन गरेको पाँच दिने व्यवसाय सुधार तथा व्यवस्थापनका लागि व्यवसायिक योजना सम्बन्धी तालिम सम्पन्न भएको छ ।
तालिममा दुहबी नगरपालिकाका प्रमुख वेद नारायण गच्छादारकी पत्नी संगीता गच्छादार सहित व्यवसाय सञ्चालन गरिरहेका ३८ जना उद्यमी महिला तथा पुरुषको सहभागिता रहेको थियो ।
तालिम सम्पन्न भएपछि नगर प्रमुख गच्छादारले सहभागीहरुलाई प्रमाणपत्र वितरण गरेका हुन् । कार्यक्रममा उपमेयर मेनुका खतिवडा, लघुउद्यम शाखा प्रमुख दिवेश चौधरी लगायतको उपस्थिति रहेको थियो ।
पाँच दिनसम्म सञ्चालन भएको तालिममा सहभागीहरुलाई उत्पादन लागत निर्धारण गर्ने तरिका, वस्तुको मूल्य निर्धारण, बजार व्यवस्थापनमा आउने समस्या समाधान, नाफा–नोक्सानको विश्लेषण, कुल लगानी तथा पूँजी व्यवस्थापन, वस्तुको गुणस्तर कायम गर्ने उपाय, लक्षित ग्राहक तथा बजार पहिचान, प्रति इकाइ वस्तुको मूल्य निर्धारण, स्थिर सम्पत्ति तथा लगानी फिर्ता अवधिबारे जानकारी गराइएको थियो ।
प्रमाणपत्र वितरण कार्यक्रममा बोल्दै नगर प्रमुख गच्छादारले कुनै पनि काम सानो वा ठूलो नहुने उल्लेख गर्दै आर्थिक आत्मनिर्भरता नै सफल मानिसको पहिचान, अस्तित्व र सामाजिक प्रतिष्ठाको आधार भएको बताए ।
उनले तालिमबाट सिकेको सीप, अनुभव, दक्षता, पूँजी र बजारलाई समय सापेक्ष सदुपयोग गर्न सहभागी उद्यमीहरुलाई आग्रह गरे ।
लघुउद्यममार्फत सयौँ स्थानीयलाई रोजगारी सिर्जना गर्ने लक्ष्यसहित नगरपालिकाले ठूलो लगानी गरिरहेको उल्लेख गर्दै उनले आफूले सुरु गरेका परियोजनामा अन्तिम समयसम्म साथ र सहयोग रहने प्रतिबद्धता व्यक्त गरे ।
आगामी दिनमा युरोपियन युनियनबाट आउने वैदेशिक तालिम तथा सहयोगसमेत यस्ता उद्यमीहरुलाई प्राथमिकतामा राखेर प्रदान गरिने जानकारी उनले दिए ।
साथै उनले हतोत्साहित नभई उत्साहका साथ आफ्नो व्यवसायिक योजना अगाडि बढाउन आग्रह गर्दै नगरपालिका सधैं उद्यमीहरुको साथमा रहने विश्वास दिलाए ।
उपमेयर मेनुका खतिवडाले महिला आर्थिक सशक्तीकरण नै पालिकाको समग्र विकास र उन्नतिको आधार भएको बताइन् ।
