वीरेन्द्रनगर ।वीरेन्द्रनगर नगरपालिकाले नगर प्रहरीबाट दुर्व्यवहारमा परेकी काफल व्यवसायी महिलासँग माफी माग्दै राहत तथा क्षतिपूर्ति उपलब्ध गराएको छ।
नगर प्रमुख मोहनमाया ढकालले नगरपालिकामा बोलाएर काफल बेच्दै आएकी धमिला चौलागाईँसँग क्षमायाचना गर्दै क्षतिपूर्ति प्रदान गरेकी हुन्। क्षतिपूर्तिको रकम भने सार्वजनिक गरिएको छैन।
नगरपालिकाका प्रमुख प्रशासकीय अधिकृत लक्ष्मीप्रसाद बास्कोटाले विज्ञप्ति जारी गर्दै घटनामा संलग्न नगर प्रहरीमाथि आवश्यक विभागीय कारबाही गरिने बताएका छन्।
बुधबार जारी विज्ञप्तिअनुसार वडा नम्बर ६ स्थित सिटी बसपार्क क्षेत्रमा सडक पेटी तथा फुटपाथ व्यवस्थापन गर्ने क्रममा नगर प्रहरीले चौलागाईँमाथि गरेको व्यवहारप्रति नगरपालिका गम्भीर बनेको जनाएको छ।
घटनापछि सामाजिक सञ्जालमा नगर प्रहरीको व्यवहारको व्यापक आलोचना भएको थियो। त्यसपछि नगरप्रमुख ढकालले पीडित महिलासँग भेट गर्दै समस्या समाधानका लागि पहल गरेकी हुन्।
नगरपालिकाले गल्ती स्वीकार गर्दै आगामी दिनमा सेवा प्रवाहलाई थप मानवीय र व्यवस्थित बनाउने प्रतिबद्धता जनाएको छ।
