विराटनगर । मोरङको धनपालथान गाउँपालिका–दादरबैरियानजिक हुलाकी राजमार्ग क्षेत्रमा गम्भीर अवस्थामा फेला परेका विराटनगरका एक किशोरको उपचार आर्थिक अभावका कारण प्रभावित बनेको छ ।
विराटनगर महानगरपालिका–७ भृकुटी चोक निवासी १७ वर्षीय विश्वास मण्डल गत सोमबार राति गम्भीर घाइते अवस्थामा फेला परेका थिए । राति करिब १ बजेतिर टाउकोमा चोट लागेको अवस्थामा प्रहरीले उनलाई उद्धार गरी तत्काल उपचारका लागि विराटनगरस्थित गोल्डेन अस्पताल पुर्याएको थियो ।
हाल विश्वासको अस्पतालको आइसियुमा उपचार भइरहेको छ । चिकित्सकको निगरानीमा उपचार जारी रहे पनि उपचार खर्च व्यवस्थापन गर्न परिवारलाई कठिनाइ भइरहेको जनाइएको छ ।
विश्वासका दाजु श्याम मण्डलका अनुसार उपचारका लागि आवश्यक खर्च जुटाउन परिवारले विभिन्न प्रयास गरिरहेको छ । उनले आर्थिक अवस्था कमजोर भएका कारण उपचारलाई निरन्तरता दिन चुनौती थपिएको बताए ।
परिवारले विश्वासको स्वास्थ्य सुधारका लागि सहयोग र सद्भावको अपेक्षा गरेको छ । श्यामका अनुसार उनलाई ९८१४३५६९९९ मा इसेवा मार्फत् सहयोग गर्न सकिने छ ।
प्रहरीका अनुसार घटनाको कारण खुल्न बाँकी छ । यस विषयमा आवश्यक अनुसन्धान अगाडि बढाइएको छ ।
