काठमाडौं– नेपाली कांग्रेसका संसदीय दलका नेता भीष्मराज आङ्देम्बेले सरकारले संवेदनशील निकायका पदाधिकारीहरूलाई बर्खास्त गरेर संस्थाहरूमा ‘भ्याकुम’ सिर्जना गरेको आरोप लगाएका छन्।
बुधबार प्रतिनिधिसभाको शून्य समयमा बोल्दै उनले राजनीतिक भागबण्डाका आधारमा नियुक्ति गरिएको भन्दै विभिन्न संवेदनशील संस्थाका पुराना पदाधिकारी हटाइएको बताए।
उनले संक्रमणकालीन न्यायसम्बन्धी आयोगलगायत निकायलाई छिट्टै सक्षम र निष्पक्ष व्यक्तिहरूबाट सक्रिय बनाउनुपर्ने आवश्यकता औंल्याए। विस्तृत शान्ति सम्झौता भएको दुई दशक बितिसक्दा पनि द्वन्द्वपीडितले न्याय नपाएको उनको भनाइ थियो।
आङ्देम्बेले सत्य निरूपण तथा मेलमिलाप आयोग (TRC) सम्बन्धी ऐन संशोधन भए पनि अझै कानुनी कमजोरी बाँकी रहेको बताए। नयाँ नियुक्तिभन्दा अघि ती कमजोरी सुधार्न ऐनको चौथो संशोधन आवश्यक रहेको उल्लेख गर्दै उनले यसतर्फ सरकारले ध्यान दिनुपर्ने धारणा राखे।
