काठमाडौं । प्रस्तावित प्रधानन्यायाधीश डा. मनोज शर्मा विरुद्ध हालसम्म ७ वटा उजुरी परेको छ ।
संसदीय सुनुवाइ समिति सचिवालयका अनुसार शनिबार साँझसम्म ७ उजुरी दर्ता भएका हुन् । संसद् सचिवालयका प्रवक्ता सहसचिव एकराम गिरी ले सोमबार कार्यालय समयसम्म उजुरी दिन सकिने जानकारी दिएका छन् ।
गत वैशाख २६ गते बसेको संसदीय सुनुवाइ समितिको बैठकले शर्माविरुद्ध १० दिनको समय दिएर उजुरी आह्वान गर्ने निर्णय गरेको थियो ।
समिति सभापति बोधनारायण श्रेष्ठ का अनुसार मंगलबार समितिको बैठक बसेर उजुरी खोलिनेछ । त्यसपछि अध्ययनका लागि उजुरीहरू सबै सदस्यलाई वितरण गरिने तयारी छ ।
समिति सचिवालयका अनुसार हुलाक, इमेल, प्रत्यक्ष पत्र तथा समिति सदस्यमार्फत उजुरी दिन सकिने व्यवस्था गरिएको छ । साथै, ७७ वटै जिल्ला प्रशासन कार्यालयबाट पनि उजुरी दर्ता गर्न सकिनेछ ।
उजुरी दिँदा विषयवस्तुको आधार र कारण स्पष्ट खुलाउन आग्रह गरिएको छ । संवैधानिक परिषद् बाट प्रधानन्यायाधीशमा सिफारिस भएका शर्मालाई संसदीय सुनुवाइ समितिले अनुमोदन गरेपछि राष्ट्रपतिबाट नियुक्ति हुने संवैधानिक व्यवस्था छ ।
